सावंतवाडी : सावंतवाडीकरांचे अनेक वर्षांपासूनचे स्वप्न असलेल्या प्रस्तावित मल्टीस्पेशालिटी रुग्णालयाच्या जागेचा प्रश्न अखेर न्यायालयीन प्रक्रियेतून मार्गी लागला आहे. जनहिताचा व्यापक दृष्टिकोन ठेवून सावंतवाडी राजघराण्याचे राजेसाहेब खेमसावंत शिवरामराजे भोंसले यांनी शहरातील मोक्याच्या ठिकाणची करोडो रुपये किमतीची 70 गुंठे जमीन महाराष्ट्र शासनास विनामोबदला दिली आहे. यामुळे रुग्णालयाच्या उभारणीचा मार्ग पूर्णपणे सुकर झाला आहे अशी माहिती सावंतवाडी संस्थानचे युवराज लखमराजे भोंसले यांनी दिली आहे. 

राजघराण्याच्या मालिकी हक्काच्या या जागेबाबत उच्च न्यायालय कोल्हापूर खंडपीठासमोर झालेल्या सुनावणीदरम्यान सावंतवाडी संस्थानच्या कुटुंबियांनी वेळेत आवश्यक प्रतिज्ञापत्रे सादर करून पूर्ण सहकार्य केले. एवढेच नव्हे तर, रुग्णालयाच्या मंजुरीसाठी खेम सावंत भोंसले आणि लखमराजे खेम सावंत भोंसले यांनी वरिष्ठ शासकीय पातळीवर स्वखर्चाने वारंवार पाठपुरावा केला आहे.  

समाजहिताची परंपरा कायम

सार्वजनिक आणि समाजहिताला प्राधान्य देण्याची सावंतवाडी संस्थानची परंपरा जुनीच आहे. यापूर्वीही संस्थानने सावंतवाडी गार्डन, शिल्पग्राम, आंबेडकर स्मारक, राणी जानकीबाई सुतिकागृह आणि नरेंद्र डोंगरावरील पाण्याची टाकी यांसारख्या अनेक सार्वजनिक उपक्रमांसाठी आपली जमीन विनामोबदला उपलब्ध करून दिली आहे. श्रीमंत खेम सावंत, पुण्यश्लोक बापुसाहेब महाराज, श्रीमंत शिवरामराजे खेम सावंत भोंसले यांनी सुरू केलेली ही सामाजिक बांधिलकीची परंपरा सध्याच्या पिढीतील खेमसावंत भोंसले, सौ. शुभदादेवी भोंसले, युवराज लखमराजे भोंसले आणि नगराध्यक्षा सौ. श्रद्धाराजे भोंसले तितक्याच निष्ठेने पुढे चालवत आहेत. या प्रकरणात सकारात्मक आणि महत्त्वाची भूमिका बजावल्याबद्दल कोल्हापूर उच्च न्यायालय खंडपीठ, सर्व पक्षकार, वकील आणि शासकीय अधिकाऱ्यांचे सावंतवाडी राजघराण्याच्यावतीने आभार मानण्यात आले आहेत.