
कणकवली : महावितरणकडून तांत्रिक कामासाठी सोमवारी १६ नोव्हेंबर रोजी कणकवली शहरासह परिसरातील गावांचा वीजपुरवठा सकाळी ९ ते सायंकाळी ५.३० या कालावधीत बंद ठेवण्यात येणार असल्याचे जाहीर करण्यात आले होते. मात्र, नियोजित वेळ संपूनही सायंकाळी सात वाजून गेल्यानंतर कणकवली शहरासह आजूबाजूच्या गावांमधील वीजपुरवठा पूर्ववत झालेला नसल्याने नागरिकांना अंधाराचा सामना करावा लागत आहे.
महापारेषणच्या १३२/३३ केव्ही कणकवली अतिउच्चदाब उपकेंद्राच्या वार्षिक देखभाल व दुरुस्तीच्या कामासाठी उपकेंद्रातून बाहेर पडणाऱ्या सर्व ३३ केव्ही उच्चदाब वाहिन्या बंद ठेवण्यात येणार असल्याची माहिती महावितरणकडून देण्यात आली होती. परिणामी, कणकवली शहर व परिसराला वीजपुरवठा करणाऱ्या ३३/११ केव्ही कणकवली उपकेंद्राचाही वीजपुरवठा बंद ठेवण्यात आला होता.
मात्र, सकाळी नऊ वाजल्यापासून बंद असलेला वीजपुरवठा सायंकाळी ५.३० वाजेपर्यंत पूर्ववत होणे अपेक्षित असताना सात वाजूनही वीजपुरवठा सुरू न झाल्याने नागरिकांमध्ये नाराजी व्यक्त होत आहे. दिवसभर वीज नसल्याने व्यापारी, व्यावसायिक, दुकानदार तसेच घरगुती ग्राहकांना मोठ्या गैरसोयीचा सामना करावा लागत आहे.
नियोजित वेळेपेक्षा अधिक काळ वीजपुरवठा बंद राहिल्याने नागरिकांकडून नाराजी व्यक्त केली जात असून, वीजपुरवठा नेमका कधी सुरू होणार, असा सवाल उपस्थित केला जात आहे. महावितरणने तातडीने वीजपुरवठा पूर्ववत करून नागरिकांना दिलासा द्यावा, अशी मागणी होत आहे.
ताजी बातमी
View all




संबंधित बातम्या
View all








