​सिंधुदुर्ग : माजी आमदार वैभव नाईक यांना जनतेने गंभीरतेने न घेतल्यामुळेच त्यांना आपली आमदारकी गमावावी लागली, असा हल्लाबोल सिंधुदुर्ग जिल्हा परिषदेचे माजी अध्यक्ष काका कुडाळकर यांनी केला आहे. आमदार निलेश राणे यांच्याबाबत वैभव नाईक यांनी केलेल्या टीकेला प्रत्युत्तर देताना कुडाळकर यांनी नाईक यांच्या भूमिकेचा तीव्र शब्दांत समाचार घेतला.

​निलेश राणेंच्या कामाचा धडाका आणि जनतेचा विश्वास

​काका कुडाळकर यांनी आपल्या निवेदनात म्हटले आहे की, आमदार निलेश राणे आमदार झाल्यापासून त्यांनी विकासाचा मोठा धडाका लावला असून ते जनतेच्या विश्वासाला पूर्णपणे पात्र ठरत आहेत. लोकांना आता असे वाटू लागले आहे की, निलेश राणे यापूर्वीच आमदार व्हायला हवे होते. त्यांच्या याच यशामुळे आणि लोकप्रियतेमुळे वैभव नाईक यांना सर्वत्र निलेश राणेंच दिसत आहेत, असा टोला त्यांनी लगावला.

​युतीधर्माबाबत बोलताना कुडाळकर म्हणाले की, "आम्ही युतीमधूनच आमचा आमदार विजयी केला आहे आणि निलेश राणे युतीधर्म पाळूनच काम करत आहेत. परंतु, शिवसेनेचे मुख्य नेते तथा महाराष्ट्राचे कार्यक्षम उपमुख्यमंत्री एकनाथ शिंदे यांच्यावर कोणी टीका केल्यास, त्या टिकेला त्याच पद्धतीने उत्तर देण्याचे काम त्यांचे विश्वासू शिलेदार म्हणून निलेश राणे करत असतात." त्यामुळे निलेश राणे कोणाच्या जीवावर निवडून आले, यावर बोलण्यापेक्षा वैभव नाईक यांनी आपल्या स्वतःच्या भूतकाळाचा अभ्यास करावा, असा सल्ला त्यांनी दिला.

​वैभव नाईक यांच्यावर निशाणा साधताना कुडाळकर म्हणाले की, नाईक हेदेखील २०१९ च्या निवडणुकीत शिवसेना-भाजप युती म्हणूनच निवडून आले होते. परंतु, त्यांच्या नेत्यांनी युतीधर्म मोडून काँग्रेस-राष्ट्रवादीसोबत आघाडी केली. त्यावेळी भाजपच्या पाठीवर निवडून येऊन भाजपशी बेईमानी केल्याचे जनता अजूनही विसरलेली नाही. कुडाळच्या विकासासाठी अहोरात्र मेहनत घेणारे आणि सत्तेत असतानाही जनतेवर होणाऱ्या अन्यायाविरुद्ध विधान परिषदेमध्ये आवाज उठवणारे नेते म्हणून निलेश राणे यांच्याकडे पाहिले जाते, असेही ते म्हणाले.

​जनतेने दहा वर्षांनंतर गंभीरतेने विचार करून निलेश राणे यांच्या हातात नेतृत्त्व दिले आहे, तर वैभव नाईक यांना जनतेने गंभीरतेने न घेतल्यामुळेच ते माजी आमदार झाले आहेत, हे त्यांनी विसरू नये, असे कुडाळकर यांनी म्हटले आहे. निलेश राणे यांच्या कर्तृत्वामुळे शिवसेना पक्ष धडाडीने पुढे जात असून भविष्यात जनतेकडून वैभव नाईक किंवा त्यांच्या सहकाऱ्यांना कधीही स्वीकारले जाणार नाही, हे सत्य त्यांनी स्वीकारले पाहिजे, अशा शब्दांत  कुडाळकर यांनी आपल्या भावना व्यक्त केल्या आहेत.