दोडामार्ग : दोडामार्ग तालुक्यातील कुडासे येथे घराजवळील रस्त्यावर बॉम्बे शिल्डटेल (Bombay Shieldtail) या सापाचे दर्शन झाल्याची नोंद करण्यात आली आहे. मंगळवारी 29 सप्टेंबर रोजी सर्पमित्र प्रकाश नाईक आणि सर्पमित्र सिद्धेश धारगळकर यांनी या सापाचे निरीक्षण केले.

सह्याद्रीच्या जैवविविधतेच्या दृष्टीने महत्त्व असलेल्या या सापाच्या स्थानिक अधिवासातील उपस्थितीमुळे वन्यजीव प्रेमींमध्ये उत्सुकता निर्माण झाली आहे. दोडामार्ग तालुका हा जैवविविधतेने समृद्ध असून, अशा वन्यजीवांच्या नोंदीमुळे स्थानिक सरीसृपांच्या अभ्यासाला आणि संवर्धनाच्या प्रयत्नांना चालना मिळू शकते.

रस्त्यालगत आढळणाऱ्या सापांना इजा न करता त्यांना सुरक्षित ठेवणे आणि नागरिकांमध्ये सर्प संवर्धनाबाबत जनजागृती करणे आवश्यक आहे. सर्पमित्र प्रकाश नाईक आणि सर्पमित्र सिद्धेश धारगळकर यांच्या निरीक्षणामुळे दोडामार्ग तालुका परिसरातील वन्यजीव विविधतेकडे पुन्हा एकदा लक्ष वेधले गेले आहे.