सावंतवाडी : उपजिल्हा रुग्णालयात सर्वसामान्य रुग्णांना बेड उपलब्ध होत नसल्याची बाब समोर आली असून रुग्णालयातील सुविधांअभावी रुग्णांची गैरसोय होत असल्याचा आरोप उद्धव बाळासाहेब ठाकरे शिवसेनेचे सावंतवाडी विधानसभा मतदारसंघ प्रमुख रुपेश राऊळ यांनी केला आहे.

वेंगुर्ले तालुक्यातील तुळस येथील विकास बर्डे या युवकाला मारहाण झाल्यानंतर त्याच्या उपचारादरम्यान घडलेल्या प्रकारावरून ठाकरे शिवसेनेचे पदाधिकारी आक्रमक झाले. त्यांनी रुग्णालयाचे वैद्यकीय अधीक्षक वर्ग एकचे डॉ. विशाल रेड्डी यांना जाब विचारत घेराव घातला. यापुढे अशा प्रकारांची पुनरावृत्ती होऊ देणार नसल्याचे आश्वासन मिळाल्यानंतर हा घेराव मागे घेण्यात आला.

यावेळी विकास बर्डे यांच्या पत्नी आणि नातेवाईक उपस्थित होते. तसेच जिल्हा संघटक शब्बीर मणियार, उपजिल्हाप्रमुख चंद्रकांत कासार, विधानसभा मतदारसंघ प्रमुख रुपेश राऊळ, तालुकाप्रमुख राजू शेटकर, उपतालुकाप्रमुख अशोक धुरी, नगरसेवक देवा टेमकर, विभागप्रमुख विनोद काजरेकर, नामदेव नाईक, सुनील गावडे, उपविभागप्रमुख प्रशांत बुगडे, विनोद ठाकूर, संदीप गवस यांच्यासह तुळस गावातील ग्रामस्थ, रुग्ण आणि नातेवाईक उपस्थित होते.