वेंगुर्ला : सावंतवाडी विधानसभा मतदारसंघातील नागरिकांना दर्जेदार आरोग्यसेवा उपलब्ध व्हावी आणि आर्थिक अडचणींमुळे कोणालाही उपचारांपासून वंचित राहावे लागू नये, या उद्देशाने भारतीय जनता पार्टीच्यावतीने १६ ऑक्टोबर २०२६ पर्यंत ''भव्य मोफत महाआरोग्य शिबिरा''चे आयोजन करण्यात आले आहे. या शिबिरास प्रारंभ झाला असून उद्या वेंगुर्ला तालुक्यात याचे आयोजन करण्यात आले आहे. त्यामुळे जास्तीत जास्त नागरिकांनी लाभ घ्यावा, असे आवाहन भारतीय जनता पार्टीच्या सर्व पदाधिकारी, लोकप्रतिनिधी आणि कार्यकर्त्यांच्यावतीने करण्यात आले आहे.
पंतप्रधान नरेंद्र मोदी यांच्या वाढदिवसानिमित्त राबविण्यात येणाऱ्या 'सेवा संकल्प अभियान-२०२६' अंतर्गत, भाजपा महाराष्ट्र प्रदेशाध्यक्ष रविंद्र चव्हाण यांच्या वाढदिवसानिमित्त तसेच पालकमंत्री नितेश राणे यांच्या मार्गदर्शनाखाली आणि भाजपा युवा नेते विशाल प्रभाकर परब यांच्या वाढदिवसानिमित्त त्यांच्या पुढाकारातून या महाआरोग्य शिबिराचे आयोजन करण्यात आले आहे.
वेंगुर्ला शहरात उपजिल्हा रुग्णालय वेंगुर्ला येथे वेताळ प्रतिष्ठान तुळस व इनरव्हील क्लब वेंगुर्ला यांच्या सहकार्याने सकाळी १० वाजता हे आयोजन करण्यात आले आहे. भाजपचे जेष्ठ नेते तथा आमदार प्रमोद जठार यांच्या हस्ते याचे उद्घाटन होणार असून प्रमुख पाहुणे म्हणून भाजपचे प्रदेश कार्यकारणी सदस्य शरद चव्हाण व अनेक मान्यवर यावेळी उपस्थित राहणार आहेत. उपजिल्हा रुग्णालय वेंगुर्ला याठिकाणी सकाळी १० वाजता याचा शुभारंभ करण्यात येणार आहे.
यामध्ये नागरिकांना आरोग्य तपासणी, वैद्यकीय सल्ला आणि आवश्यक आरोग्यविषयक मार्गदर्शनासह वैद्यकीय तज्ज्ञांकडून आरोग्य तपासणी व वैद्यकीय मार्गदर्शन उपलब्ध करून देण्याचे नियोजन करण्यात आले आहे. हृदयरोग, नेत्ररोग, अस्थिरोग, स्त्रीरोग, बालरोग, कान-नाक-घसा यांसह विविध वैद्यकीय विभागांतील तपासणी आणि आवश्यकतेनुसार पुढील उपचारांसाठी मार्गदर्शन करण्यात येणार आहे. तसेच रुग्णांना पुढील उपचार किंवा शस्त्रक्रियेची आवश्यकता असेल अशा रुग्णांना उपलब्ध शासकीय आरोग्य योजनांच्या माध्यमातून उपचार मिळवून देण्यासाठी आवश्यक मार्गदर्शन व समन्वय साधण्यावरही भर देण्यात येणार आहे. या मोफत महाआरोग्य शिबिराचा लाभ घ्यावा, असे आवाहन भारतीय जनता पार्टी सावंतवाडी विधानसभा मतदारसंघातील सर्व पदाधिकारी, लोकप्रतिनिधी आणि कार्यकर्त्यांच्या वतीने करण्यात येत आहे.
