नवी दिल्ली : दिल्लीतील मंगोलपुरी भागात पादचाऱ्यांवर चाकूने हल्ला झाल्याची एक खळबळजनक घटना समोर आली आहे. या घटनेत सहा जण जखमी झाले असून त्यांना उपचारासाठी रुग्णालयात दाखल करण्यात आले आहे. पोलीस या प्रकरणाचा तपास करत आहेत.
पोलिसांनी दिलेल्या माहितीनुसार, शुक्रवारी संध्याकाळी मंगोलपुरी भागातील 'एल' ब्लॉकमधील तीन वेगवेगळ्या गल्ल्यांमध्ये काही जणांच्या गटाने पादचाऱ्यांवर चाकूने हल्ला केला. यात किमान सहा जण जखमी झाले. जखमींना उपचारासाठी संजय गांधी मेमोरियल रुग्णालयात नेण्यात आले आणि त्यापैकी दोघांना नंतर सफदरजंग रुग्णालयात हलवण्यात आले, असे पोलिसांनी सांगितले.
पोलिसांच्या म्हणण्यानुसार, पोलीस सीसीटीव्ही फुटेजची तपासणी करत आहेत. यातून हल्लेखोरांची ओळख पटवण्यासाठी मदत होणार आहे. संशयितांपैकी काही जण अल्पवयीन असल्याचे सांगण्यात येत आहे. प्राथमिक तपासावरून असे दिसून येते की हा हल्ला जुन्या वैमनस्यातून झाला असावा. मात्र, स्थानिकांचा आरोप आहे की हल्लेखोरांनी लोकांची लूटमारही केली आणि या घटनेमुळे परिसरात भीतीचे वातावरण निर्माण झाले.
प्रत्यक्षदर्शींच्या म्हणण्यानुसार, १७ ते २० वयोगटातील तीन तरुण त्यांच्याजवळ आले आणि त्यांच्या कामात अडथळा आणू लागले त्यामुळे दोन्ही बाजूंमध्ये वाद झाला.
पोलिसांनी सांगितले की, या वादादरम्यान एका आरोपीने पीडित व्यक्तीला पकडून ठेवले, तर दुसऱ्याने आपल्या साथीदाराच्या हातात चाकू दिला आणि त्याने पीडितेच्या पोटात वार केला. हल्ल्यानंतर आरोपी नांगलोई रेल्वे स्थानकाच्या दिशेने पळून गेले.
