पुणे : राज्याच्या राजकारणात गेल्या काही महिन्यात अनेक मोठ्या घडामोडी घडल्याचे पाहायला मिळत आहे. जुलै महिन्याच्या सुरुवातीलाच राष्ट्रवादी काँग्रेस पक्षामध्ये शिवसेनेप्रमाणे फूट पडली आणि राष्ट्रवादीमध्ये दोन गट तयार झाले. ज्यानंतर शरद पवारांच्या राष्ट्रवादीतून बरीचशी जुनी नेतेमंडळी राष्ट्रवादीच्या दुसऱ्या गोटात म्हणजेच अजित पवार यांच्या गटात गेली. यावेळी खूप कमी लोक हे शरद पवार यांच्यासोबत राहिले. पण यावेळी शरद पवारांच्या नातूने म्हणजेच रोहित पवारांनी आजोबांना पाठिंबा दिला. त्यानंतर बऱ्याचशा बैठकांमध्ये रोहित पवार हे शरद पवारांसोबत सावलीप्रमाणे उभे राहिलेले पाहायला मिळाले. या नातवानंतर आता शरद पवार यांचा आणखी एक नातू राजकारणात प्रवेश करणार असल्याची चर्चा राजकीय वर्तुळात सुरू झाली आहे.
युगेंद्र श्रीनिवास पवार हे पवार घराण्यातील आणखी एक युवा हे राजकारणात प्रवेश करणार असल्याची माहिती समोर आली आहे. युगेंद्र पवार हे उपमुख्यमंत्री अजित पवार यांचे थोरले बंधू श्रीनिवास पवार यांचे चिंरजीव आहेत. पण ते अजित पवार यांचे पुतणे असून देखील शरद पवार गटातून राजकारणात प्रवेश करणार असल्याने राजकीय वर्तुळात विविध चर्चांना उधाण आले आहे. राष्ट्रवादीच्या फुटीनंतर युगेंद्र पवार शरद पवारांसोबत दिसून आले. शरद पवारांच्या वाढदिवसानिमित्त आयोजित कुस्ती स्पर्धेचे युगेंद्र पवार आयोजक आहेत. बारामती कुस्ती संघाच्या अध्यक्षपदाची जबाबदारी त्यांच्यावर आहे. त्यामुळे आता याच कारणामुळे त्यांच्या राजकारणातील एन्ट्रीवर चर्चा होऊ लागली आहे.युगेंद्र पवार यांचे वडील हे पुण्यातील नावाजलेले उद्योजक आहेत. त्यांचा शरयू ग्रुप आहे. हा ग्रुप कृषी, ऑटोमोबाईल, रियल इस्टेट, डिलरशीप आणि सिक्युरीटी सर्व्हिसेसमध्ये कार्यरत आहे. श्रीनिवास पवार राजकारणापासून बाहेर राहतात. शरद पवार त्यांचे काका आहेत. परंतु आता त्याचा मुलगा युगेंद्र राजकारणात येत आहे. त्यामुळे आता पवार घराण्यातील आणखी एक युवा नेतृत्व राजकारणात येणार असल्याची चर्चा सुरू झाल्याने राष्ट्रवादीचे राजकारण काही बदलते की तेच राहते? जर का युगेंद्र पवार यांनी अजित पवार गटात न जाता शरद पवार गटाला पाठिंबा दिला तर यामुळे काही वेगळे राजकारण रंगते का? यांसारखे अनेक प्रश्न आता निर्माण होऊ लागले आहेत.
