सिंधुदुर्ग : सिंधुदुर्ग जिल्ह्यात होणारी एमआरएफ टायर कंपनीची भरती प्रक्रिया गोव्यातील राजकीय दबावामुळे रद्द होण्याची शक्यता निर्माण झाली आहे. महाराष्ट्र नवनिर्माण सेनेचे (मनसे) जिल्हाध्यक्ष धीरज परब यांनी स्थानिक तरुणांना रोजगाराची संधी उपलब्ध करून देण्यासाठी ही भरती आयोजित केली होती.
नेमके प्रकरण काय?
९ सप्टेंबर रोजी एमआरएफ कंपनीकडून परब यांना या भरतीबाबत अधिकृत ईमेल प्राप्त झाला होता. यानुसार सिंधुदुर्गमधील इच्छुक तरुणांसाठी विनामूल्य भरती प्रक्रिया राबविण्याची योजना धीरज परब यांच्या पुढाकाराने संपन्न होत होती. परंतु, ही माहिती गोव्यात पोहोचताच तिथल्या राजकीय वर्तुळात तसेच सोशल मीडियावर मोठी प्रतिक्रिया उमटल्या.
गोव्याचा विरोध
गोव्यातील काही नेते व स्थानिकांनी, “सिंधुदुर्गमधील तरुणांना गोव्यात नोकऱ्या मिळू नयेत,” असा सूर लावत या भरतीला तीव्र विरोध दर्शवला. स्थानिक रोजगारावर बाहेरच्या तरुणांचा डोळा असल्याचा आरोप करत गोव्यातील काही राजकीय गटांनी कंपनीवर दबाव आणल्याचे समजते.
पार्श्वभूमी
सिंधुदुर्ग आणि गोवा यांतील भौगोलिक जवळीक लक्षात घेता मोठ्या संख्येने सिंधुदुर्गमधील युवक रोजगारासाठी गोव्यात जातात. पर्यटन क्षेत्रात काम करणाऱ्या या युवकांना चांगली संधी मिळत असल्यानेच एमआरएफची भरती देखील सिंधुदुर्गमध्ये आयोजित करण्यात आली होती. मात्र, स्थानिकांचा विरोध तीव्र झाल्याने कंपनीने प्रक्रिया रद्द करण्याचा निर्णय घेतल्याची माहिती समोर आली आहे.
रोजगार संधीवर संकट
या घडामोडींमुळे सिंधुदुर्गच्या शेकडो तरुणांना मिळणारी रोजगाराची संधी वाया जाण्याची शक्यता आहे. जिल्हाध्यक्ष धीरज परब यांनी याबाबत खेद व्यक्त करत स्थानिक युवकांसाठी रोजगार निर्मितीचे प्रयत्न सुरूच ठेवण्याचा निर्धार व्यक्त केला आहे. मात्र गोव्यातील एमआरएफ कंपनीकडून कुडाळ येथे होणारी उद्याची भरती प्रक्रिया रद्द झाल्याचेही त्यांनी स्पष्ट केले आहे.
