मुंबई : येत्या काही दिवसांतच गणेशाचे आगमन होणार असून मुंबईतील चाकरमानी कोकणात गणेशोत्सव साजरा करण्यासाठी दाखल होणार आहे. यावेळी चाकरमानी प्रवाशांची वाढती गर्दी लक्षात घेत मध्य रेल्वेने गणेशोत्सवासाठी 34 अतिरिक्त रेल्वे गाड्या चालविण्याचा निर्णय घेतला आहे. यामध्ये 4 आरक्षित विशेष गाड्या लोकमान्य टिळक टर्मिनस आणि मडगाव दरम्यान तसेच ३० अनारक्षित मेमू पनवेल आणि चिपळूण दरम्यान धावणार आहेत.

4 आरक्षित विशेष गाड्यांमध्ये गाडी क्रमांक ०१००३ ही विशेष गाडी १६ सप्टेंबर आणि १९ सप्टेंबर रोजी लोकमान्य टिळक टर्मिनस ते मडगाव या मार्गावर धावणार असून एलटीटीवरुन ही गाडी सकाळी ७.५० वाजता सुटेल आणि रात्री २३.४५ वाजता मडगाव येथे पोहोचेल. तर दुसरी ०१००४ विशेष गाडी मडगाव येथून १५ सप्टेंबर आणि १८ सप्टेंबर रोजी सायंकाळी १६ वाजता सुटेल आणि दुसऱ्या दिवशी सकाळी ६.०५ वाजता एलटीटी येथे पोहोचेल.

'या' स्थानकांवर थांबा

या गाडीला ठाणे, पनवेल, पेण, रोहा, माणगाव, वीर, खेड, चिपळूण, सावर्डा, संगमेश्वर रोड, रत्नागिरी, आडवली, विलवडे, राजापूर रोड, वैभववाडी रोड, नांदगाव रोड, कणकवली, सिंधुदुर्ग, कुडाळ, सावंतवाडी रोड, थिवि आणि करमळी हे थांबे देण्यात आले आहेत.

मेमू अनारक्षित विशेष गाडी

१० सप्टेंबर ते १४ सप्टेंबर आणि १८ सप्टेंबर ते २७ सप्टेंबर या कालावधीत गाडी क्रमांक ०११५९ मेमू अनारक्षित विशेष गाडी पनवेल येथून दुपारी १५.२० वाजता सुटेल आणि त्याच दिवशी रात्री २२.२० वाजता चिपळूण येथे पोहोचेल. तर १० सप्टेंबर ते १४ सप्टेंबर आणि १८ सप्टेंबर ते २७ सप्टेंबर या कालावधीत ०११६० मेमू अनारक्षित विशेष गाडी चिपळूण येथून सकाळी ९ वाजता सुटेल आणि दुपारी १४.३० वाजता पनवेल येथे पोहोचेल.

'या' स्थानकांवर थांबा

या गाडीला पेण, रोहा, कोलाड, इंदापूर, माणगाव, गोरेगाव रोड, वीर, सापे वामणे, करंजडी, विन्हेरे, दिवाणखवटी, कळंबणी बुद्रुक, खेड आणि अंजनि हे थांबे देण्यात आले आहेत.