देवगड : तालुक्यातील सैतावडे पाडागर येथे बारमाही वाहणारा नैसर्गिक जलस्रोत उपलब्ध असून,या स्रोतामधून वर्षभर मोठ्या प्रमाणात पाणी वाहत असते. मात्र, या पाण्याचे योग्य नियोजन आणि व्यवस्थापन होत नसल्याने मोठ्या प्रमाणावर पाण्याचा अपव्यय होत असल्याचे स्थानिक शेतकऱ्यांचे म्हणणे आहे.

या ठिकाणी पाणी अडविण्यासाठी उभारण्यात आलेले सिमेंट काँक्रीटचे मोठे पिलर फुटून वाहून गेले आहेत.त्यामुळे पाणी अडविण्याच्या व्यवस्थेचे नुकसान झाले असून, या ढासळलेल्या काँक्रीटच्या पिलरची पुन्हा उभारणी करण्यात यावी, अशी मागणी ग्रामस्थांकडून करण्यात येत आहे.

एकीकडे उन्हाळ्यात अनेक गावांना पाणीटंचाईचा सामना करावा लागतो, तर दुसरीकडे सैतावडे पाडागर येथील बारमाही वाहणारे मुबलक पाणी योग्य नियोजनाअभावी वाहून जात आहे.या जलस्रोताचे शास्त्रीय पद्धतीने नियोजन करून पाणी अडविणे,साठविणे आणि त्याचा शेतीसाठी उपयोग करणे शक्य आहे.यामुळे परिसरातील शेतकऱ्यांना सिंचनासाठी पाण्याची उपलब्धता होण्यास मदत होऊ शकते.

त्यामुळे संबंधित शासकीय विभागाने या जलस्रोताची पाहणी करून पाणी अडविण्याच्या व्यवस्थेची दुरुस्ती करावी.तसेच ढासळलेल्या काँक्रीटच्या पिलरची पुनर्बांधणी करून पाण्याचा अपव्यय रोखण्यासाठी कायमस्वरूपी उपाययोजना कराव्यात. शासनाने या प्रश्नाकडे गांभीर्याने लक्ष देऊन ठोस निर्णय घ्यावा, अशी मागणी सैतावडे पाडागर येथील स्थानिक नागरिक आणि शेतकऱ्यांकडून होत आहे.