रत्नागिरी : समुद्रकिनाऱ्यांवर पर्यटनाचा आनंद लुटताना होणाऱ्या दुर्दैवी दुर्घटनांना आळा घालण्यासाठी रोबोटिक वॉटर क्राफ्ट कार्यरत राहणार आहेत. हे वॉटर क्राफ्ट गणपतीपुळे, दापोली (मुरुड-लाडघर पट्टा), गुहागर, आरे-वारे आणि इतर संवेदनशील किनाऱ्यांवर तैनात केले जाणार आहेत. समुद्रात संकटात सापडलेल्या व्यक्तीपर्यंत प्रतिकूल हवामानातही हे रोबोट्स वेगाने पोहोचू शकतात, ज्यामुळे आपत्ती व्यवस्थापन विभागाची कार्यक्षमता दुपटीने वाढणार आहे. या वॉटर क्राफ्टसचे हस्तांतरण पालकमंत्री उदय सामंत यांच्या हस्ते पोलिस विभागाकडे आज करण्यात आले.
या हस्तांतरण सोहळ्याप्रसंगी आमदार शेखर निकम, जिल्हाधिकारी मनुज जिंदल, पोलीस अधीक्षक नितीन बगाटे, अतिरिक्त पोलीस अधीक्षक बी. बी. महामुनी, निवासी उपजिल्हाधिकारी चंद्रकांत सूर्यवंशी, जिल्हा आपत्ती व्यवस्थापन अधिकारी अजय सूर्यवंशी, चिपळूणचे नगराध्यक्ष उमेश सकपाळ, माजी आमदार संजय कदम आदी उपस्थित होते.
समुद्रातील बुडणाऱ्यांना तात्काळ जीवनदान मिळावे यासाठी जिल्हा नियोजन समितीच्या (डीपीसी) माध्यमातून खरेदी करण्यात आलेले ५ अत्याधुनिक 'रोबोटिक वॉटर क्राफ्ट' पालकमंत्री डॉ. उदय सामंत यांच्या हस्ते आज जिल्हा पोलीस दलाकडे सुपूर्द करण्यात आले. "गतिमान प्रशासन तथा आपत्कालीन व्यवस्थेचे बळकटीकरण करणे" या नाविन्यपूर्ण योजनेअंतर्गत ही अत्याधुनिक उपकरणे उपलब्ध करून देण्यात आली आहेत.
रत्नागिरीच्या समुद्रकिनाऱ्यांवर दरवर्षी देश-विदेशातून लाखो पर्यटकांची मांदियाळी असते. मात्र, समुद्राचा अंदाज न येणे, भरती-ओहोटीच्या वेळांची माहिती नसणे किंवा पाण्याचा तीव्र प्रवाह यामुळे मागील पाच वर्षांत तब्बल १४३ निष्पाप पर्यटक व नागरिकांचा मृत्यू झाला आहे. ही गंभीर बाब लक्षात घेऊन भविष्यातील अमूल्य मानवी जीव वाचवण्यासाठी तातडीचे बचावकार्य करता यावे, या उद्देशाने या 'लाईफ सेव्हिंग' रोबोटिक वॉटर क्राफ्ट्सचा समावेश यंत्रणेत करण्यात आला आहे.
