सिंधुदुर्ग : मत्स्यव्यवसाय व बंदरे विकास मंत्री नितेश राणे आजपासून आंध्र प्रदेशच्या दोन दिवसीय अभ्यास दौऱ्यावर आहेत. या दौऱ्यात बंदर विकास आणि जहाजबांधणी क्षेत्रातील प्रगत तंत्रज्ञान, आधुनिक कार्यपद्धती तसेच विविध नाविन्यपूर्ण उपक्रमांची ते प्रत्यक्ष पाहणी करणार आहेत.
मत्स्यव्यवसाय क्षेत्रातील आधुनिक पद्धती, मच्छीमारांसाठी निर्माण होणाऱ्या नव्या संधी, त्यांचे आर्थिक सक्षमीकरण आणि सर्वांगीण विकासाच्या दृष्टीने विविध महत्त्वपूर्ण विषयांवर या दौऱ्यात चर्चा करण्यात येणार असल्याचे मंत्री नितेश राणे यांनी एक्सवरील पोस्टद्वारे सांगितले.
आंध्र प्रदेशातील यशस्वी प्रयोग, आधुनिक तंत्रज्ञान आणि नाविन्यपूर्ण संकल्पनांचा महाराष्ट्रातील बंदर व मत्स्यव्यवसाय क्षेत्राच्या विकासासाठी प्रभावीपणे कसा उपयोग करता येईल, याचा सखोल अभ्यास या दौऱ्यात करण्यात येणार आहे. या अभ्यासातून महाराष्ट्रातील संबंधित क्षेत्रांच्या विकासासाठी उपयुक्त ठरणाऱ्या बाबींचा आढावा घेतला जाणार असल्याचे राणे यांनी नमूद केले.
