दोडामार्ग : दोडामार्ग तालुक्यातील अतिदुर्गम भागात असलेल्या जिल्हा परिषद प्राथमिक शाळा कुंभवडे येथील शैक्षणिक आणि भौतिक समस्यांकडे लक्ष वेधण्यासाठी पंचायत समितीचे उपसभापती तथा शिवसेनेचे तालुकाप्रमुख गणेशप्रसाद गवस यांनी शनिवारी ३१ ऑक्टोबर रोजी शाळेला भेट देऊन पाहणी केली. यावेळी ग्रामस्थ आणि पालकांनी शाळेतील शिक्षकांची रिक्त पदे तातडीने भरणे, शाळेला कंपाऊंड वॉल बांधून देणे तसेच तळकट-कुंभवडे रस्त्याचे खडीकरण व डांबरीकरण करण्यासह विविध मागण्या मांडल्या. या मागण्यांवर सकारात्मक भूमिका घेत संबंधित कामे मार्गी लावण्याचे आश्वासन गवस यांनी दिले.

यावेळी शिवसेना पदाधिकारी दादा देसाई, भगवान गवस, नारायण देसाई, विजय गावडे, मधुकर गावडे, सिताराम परब, बाळकृष्ण गावडे यांच्यासह शाळा व्यवस्थापन समितीचे प्रतिनिधी, माता-पालक आणि ग्रामस्थ उपस्थित होते.

शाळेच्या शैक्षणिक प्रगतीचा आणि भौतिक सुविधांचा आढावा

शाळा व्यवस्थापन समितीच्या अध्यक्षा सौ. कांबळे यांनी उपस्थितांचे स्वागत केले. यावेळी शिक्षक गोरे यांनी प्रास्ताविक करताना शाळेची सद्यस्थिती, शैक्षणिक प्रगती आणि आवश्यक असलेल्या भौतिक सुविधांची माहिती दिली. दुर्गम भागातील विद्यार्थ्यांना दर्जेदार शिक्षण मिळण्यासाठी आवश्यक सोयीसुविधा उपलब्ध करून देण्याची गरजही यावेळी अधोरेखित करण्यात आली.

शिक्षकांची दोन पदे रिक्त; तातडीने भरतीची मागणी

कुंभवडे प्राथमिक शाळेत शिक्षकांची दोन पदे रिक्त असल्याने विद्यार्थ्यांच्या शैक्षणिक प्रगतीवर परिणाम होण्याची शक्यता ग्रामस्थांनी व्यक्त केली. त्यामुळे रिक्त असलेली दोन्ही शिक्षक पदे लवकरात लवकर भरण्यात यावीत, अशी आग्रही मागणी यावेळी करण्यात आली. यावर गणेशप्रसाद गवस यांनी येत्या ४ नोव्हेंबरपर्यंत शिक्षक उपलब्ध करून देण्याचे आश्वासन दिले.

कंपाऊंड वॉलसह रस्त्याच्या कामांचा प्रश्न ऐरणीवर

शाळेच्या सुरक्षिततेच्या दृष्टीने परिसरात कंपाऊंड वॉल बांधून देण्यात यावी, अशी मागणी ग्रामस्थांनी केली. तसेच तळकट-कुंभवडे रस्त्याचे खडीकरण व डांबरीकरण करण्यात यावे, अशीही मागणी यावेळी करण्यात आली. याशिवाय वनहद्दीत येणाऱ्या रस्त्यालगत वाढलेली झाडी साफ करून वाहतुकीसाठी रस्ता अधिक सुरक्षित व सुकर करावा, अशी अपेक्षा ग्रामस्थांनी व्यक्त केली. दुर्गम भागातील नागरिकांना भेडसावणाऱ्या या समस्यांवर लवकर तोडगा काढण्याची मागणीही यावेळी करण्यात आली.

उर्वरित कामे पूर्ण करण्याचे आश्वासन

शाळेतील शिक्षकांची रिक्त पदे भरण्यासह ग्रामस्थांनी मांडलेल्या अन्य समस्यांबाबतही सकारात्मक कार्यवाही करण्याचे आश्वासन गणेशप्रसाद गवस यांनी दिले. त्यामुळे कुंभवडे शाळेच्या समस्या मार्गी लागण्याबाबत ग्रामस्थ आणि पालकांमध्ये अपेक्षा निर्माण झाल्या आहेत.