कुडाळ : कुडाळ शहरातील पानबाजार परिसरातील क्षितिज अपार्टमेंटजवळ असलेल्या एका लॅबला आज सकाळी अचानक भीषण आग लागल्याची दुर्घटना घडली. या आगीत कोणतीही जीवितहानी झाली नसली, तरी लॅबमधील महागडे साहित्य आणि उपकरणे जळून खाक झाल्याने मोठे नुकसान झाले आहे. मिळालेल्या प्राथमिक माहितीनुसार, आज सकाळी साडेसात वाजताच्या सुमारास या लॅबमधून अचानक धूर आणि आगीच्या ज्वाला निघू लागल्या. लॅबला आग लागल्याचे स्थानिक नागरिकांच्या निदर्शनास येताच परिसरात एकच खळबळ उडाली आणि घटनास्थळी नागरिकांची मोठी गर्दी जमली.

घटनेची माहिती तात्काळ कुडाळ नगरपंचायत आणि एमआयडीसी (MIDC) प्रशासनाला देण्यात आली. माहिती मिळताच दोन्ही विभागांचे अग्निशमन बंब  घटनास्थळी दाखल झाले. अग्निशमन दलाच्या जवानांनी स्थानिक नागरिकांच्या मदतीने पाण्याचा जोरदार मारा करत शर्थीचे प्रयत्न केले आणि वेळेत आगीवर पूर्णपणे नियंत्रण मिळवले. अग्निशमन दलाच्या तत्परतेमुळे आग अधिक पसरली नाही आणि मोठा अनर्थ टळला. या दुर्घटनेत सुदैवाने कोणालाही दुखापत झालेली नाही, मात्र लॅबमधील यंत्रसामग्री आणि इतर साहित्याचे प्रचंड नुकसान झाले आहे. ही आग नेमकी शॉर्ट सर्किटमुळे लागली की इतर काही कारणामुळे, याचे नेमके कारण अद्याप समजू शकलेले नाही.