
कणकवली : कणकवली शहराच्या सांस्कृतिक आणि पर्यटन वैभवात भर घालणारा कणकवली पर्यटन महोत्सव यंदाही मोठ्या उत्साहात साजरा करण्याच्या दृष्टीने नगरपंचायतीने तयारी सुरू केली आहे. खाद्य संस्कृतीची विशेष मेजवानी, लहान मुलांसाठी आकर्षक आकाशपाळणे तसेच विविध सांस्कृतिक कार्यक्रमांची रेलचेल अशा विविध उपक्रमांनी यंदाचा पर्यटन महोत्सव रंगणार आहे.
या महोत्सवाचे नियोजन अधिक प्रभावी आणि भव्य स्वरूपात करण्यासाठी कणकवली नगरपंचायतीच्या वतीने सहविचार सभेचे आयोजन करण्यात आले आहे. मंगळवार, २४ नोव्हेंबर २०२६ रोजी सायंकाळी ठीक ४ वाजता कणकवली नगरपंचायत येथे ही सभा पार पडणार आहे. यावेळी पर्यटन महोत्सवाची दिनांक व कार्यक्रमाची रूपरेषा ठरवण्यात येणार आहे.
या सभेला सांस्कृतिक क्षेत्रात कार्यरत असलेल्या स्थानिक संस्था, त्यांचे पदाधिकारी तसेच विविध क्षेत्रांतील कलावंतांना निमंत्रित करण्यात आले आहे. महोत्सवात कोणते सांस्कृतिक कार्यक्रम असावेत, स्थानिक कलावंतांना कोणत्या संधी उपलब्ध करून देता येतील, तसेच खाद्य संस्कृती आणि मनोरंजनाच्या माध्यमातून पर्यटकांना आकर्षित करण्यासाठी कोणते उपक्रम राबवावेत, याबाबत या सभेत चर्चा होणार आहे.
कणकवली पर्यटन महोत्सव हा केवळ मनोरंजनाचा कार्यक्रम न राहता स्थानिक कला, संस्कृती, खाद्यपरंपरा आणि पर्यटनाला चालना देणारे व्यासपीठ ठरावे, या दृष्टीने नियोजन करण्यात येणार आहे. सांस्कृतिक क्षेत्रातील सर्व संस्था, पदाधिकारी आणि कलावंत यांनी २४ नोव्हेंबर रोजी होणाऱ्या सहविचार सभेला वेळेवर उपस्थित राहून आपले बहुमोल विचार व सूचना मांडाव्यात आणि महोत्सव यशस्वी करण्यासाठी सहकार्य करावे, असे आवाहन कणकवलीचे नगराध्यक्ष संदेश पारकर यांनी केले आहे.
ताजी बातमी
View all




संबंधित बातम्या
View all








