दोडामार्ग : जिल्हा परिषद पूर्ण प्राथमिक केंद्रशाळा, दोडामार्ग नं. १ येथे गुरुपौर्णिमेचा पवित्र आणि संस्कारमय उत्सव मोठ्या उत्साहात साजरा करण्यात आला. भारतीय संस्कृतीमध्ये "माता, पिता आणि गुरु" यांना सर्वोच्च स्थान देण्यात आले आहे. याच संस्कारांचा वारसा विद्यार्थ्यांपर्यंत पोहोचावा, त्यांच्यामध्ये आई-वडिलांप्रती आदर, कृतज्ञता आणि गुरुजनांबद्दल श्रद्धा निर्माण व्हावी, या उदात्त हेतूने शाळेत विशेष मातृ-पितृ पूजन व गुरुपूजन कार्यक्रमाचे आयोजन करण्यात आले होते.
या कार्यक्रमासाठी विद्यार्थ्यांच्या माता-पित्यांना विशेष निमंत्रित करण्यात आले होते. शाळेत उपस्थित झालेल्या पालकांचे विद्यार्थ्यांनी पारंपरिक पद्धतीने स्वागत केले. त्यानंतर विद्यार्थ्यांनी आपल्या आई-वडिलांची गुरु म्हणून पूजा केली. त्यांच्या चरणी वंदन करून आशीर्वाद घेतला. या प्रसंगी अनेक पालकांच्या डोळ्यांत आनंदाश्रू तरळले. विद्यार्थ्यांनी व्यक्त केलेला आदर आणि प्रेम पाहून उपस्थित वातावरण अत्यंत भावनिक व भक्तिमय झाले.
कार्यक्रमादरम्यान गुरुपौर्णिमेचे महत्त्व, भारतीय संस्कृतीतील गुरुचे स्थान तसेच आई-वडील हेच जीवनातील पहिले गुरु असल्याचा संदेश विद्यार्थ्यांना देण्यात आला. शिक्षणाबरोबरच संस्कारांचे महत्त्व अधोरेखित करणारा हा उपक्रम उपस्थित सर्वांसाठी प्रेरणादायी ठरला.
कार्यक्रमाचे प्रभावी सूत्रसंचालन शाळेतील विद्यार्थिनी स्पृहा दळवी आणि अद्विका काळे यांनी आत्मविश्वासपूर्ण पद्धतीने केले. कार्यक्रमाच्या शेवटी विद्यार्थिनी निधी गवस हिने उपस्थित पालक, शिक्षक आणि मान्यवरांचे मनःपूर्वक आभार मानले.
या प्रसंगी शाळेचे मुख्याध्यापक, सर्व शिक्षक-शिक्षकेतर कर्मचारी, शाळा व्यवस्थापन समितीचे सदस्य, पालक आणि विद्यार्थी मोठ्या संख्येने उपस्थित होते. कार्यक्रमाच्या यशस्वी आयोजनासाठी सर्व शिक्षकांनी परिश्रम घेतले.
गुरुपौर्णिमेच्या निमित्ताने आयोजित करण्यात आलेल्या या संस्कारक्षम उपक्रमातून विद्यार्थ्यांमध्ये गुरुजनांप्रती आदर, पालकांप्रती कृतज्ञता, भारतीय संस्कृतीबद्दल अभिमान आणि नैतिक मूल्यांची जपणूक करण्याचा प्रभावी संदेश देण्यात आला. अशा उपक्रमांमुळे विद्यार्थ्यांच्या सर्वांगीण विकासासोबतच त्यांच्यामध्ये सामाजिक व सांस्कृतिक मूल्यांचीही दृढ रुजवात होत असल्याची भावना उपस्थित पालकांनी व्यक्त केली.
