वेंगुर्ला : श्रावण शुद्ध दशमीनिमित्त कोकणची अंबा म्हणून ख्याती असलेल्या रेडी येथील श्री देवी माऊली देवस्थानच्या सप्तोत्सवाला भक्तिमय वातावरणात उत्साहात प्रारंभ झाला आहे. सप्तोत्सवाच्या तिसऱ्या दिवशी, शनिवार दि. २२ ऑगस्ट रोजी श्री देवी माऊलीचे सुभद्रा रूप साकारण्यात आले. या रूपातील श्री देवी माऊलीचे दर्शन घेण्यासाठी भाविकांनी मोठी गर्दी केली.
यावेळी बलभद्र-सुभद्रा-जगन्नाथ, जगन्नाथपुरी येथील धार्मिक परंपरेचे दर्शन घडविणाऱ्या स्वरूपात पूजा साकारण्यात आली. भगवान जगन्नाथ हे श्रीविष्णूचे अवतार असलेल्या श्रीकृष्णाचे रूप मानले जाते. भगवान बलभद्र हे श्रीकृष्णाचे ज्येष्ठ बंधू बलराम, तर देवी सुभद्रा या श्रीकृष्ण आणि बलराम यांच्या लाडक्या भगिनी मानल्या जातात. हिंदू धर्मातील चार धामांपैकी एक असलेल्या जगन्नाथपुरी येथील जगन्नाथ मंदिराच्या धार्मिक परंपरेला विशेष महत्त्व आहे. त्याच परंपरेचा भाव भक्तांना श्री देवी माऊलीच्या सुभद्रा रूपाच्या दर्शनातून अनुभवता आला.
सप्तोत्सवानिमित्त देवस्थानात विविध धार्मिक कार्यक्रम, पूजा-अर्चा आणि अखंड हरिनाम सप्ताहाचे आयोजन करण्यात आले असून, परिसरात भक्तिमय वातावरण निर्माण झाले आहे. श्री देवी माऊलीच्या विविध रूपांतील दर्शनासाठी परिसरातील तसेच दूरवरून भाविक रेडी येथे दाखल होत आहेत.
