चिपळूण : दुष्काळजन्य परिस्थिती, आर्थिक मंदी, ऑनलाइन खरेदीचे वाढते प्रमाण, वाहतूक कोंडी, पार्किंगची समस्या आणि परप्रांतीय फिरत्या विक्रेत्यांमुळे चिपळूणच्या स्थानिक बाजारपेठेतील व्यापारावर परिणाम होत असल्याची चिंता चिपळूण व्यापारी महासंघटनेने व्यक्त केली आहे. गेल्या ६ ते ८ वर्षांत बाजारपेठेची उलाढाल कमालीची घसरल्याचे सांगत, स्थानिक व्यापाऱ्यांना दिलासा देण्यासाठी शासनाने ठोस उपाययोजना कराव्यात, अशी मागणी संघटनेने केली आहे. 

दिवाळीच्या सणाच्या पार्श्वभूमीवर स्थानिक बाजारपेठेत पुन्हा एकदा उत्साह निर्माण व्हावा आणि ग्राहकांनी अधिकृत स्थानिक व्यापाऱ्यांकडून खरेदी करावी, या उद्देशाने चिपळूण व्यापारी महासंघटनेने विशेष उपक्रम हाती घेतला आहे. याअंतर्गत चिपळूण बाजारपेठेतील विविध ठिकाणी आकर्षक स्वागत कमानी उभारण्यात आल्या असून, त्याद्वारे ग्राहकांचे स्वागत करत स्थानिक व्यापाऱ्यांकडून खरेदी करण्याचे आवाहन करण्यात आले आहे.

व्यापारी महासंघटनेच्या म्हणण्यानुसार, वाढते कर, घरपट्टी, वीजबिले, जीएसटी, सीजीएसटी, आयकर, परवाना नूतनीकरणाचा खर्च आणि बँक कर्जाचे हप्ते अशा आर्थिक जबाबदाऱ्या व्यापाऱ्यांना नियमितपणे पार पाडाव्या लागतात. मात्र, दुसरीकडे ग्राहकांची खरेदी करण्याची क्षमता कमी होत असून, ऑन‌लाइन खरेदीच्या वाढत्या प्रभावामुळे स्थानिक व्यापाऱ्यांसमोर मोठे आव्हान उभे राहिले आहे.

शासनाने शेतकऱ्यांच्या अडचणी लक्षात घेऊन दुष्काळ जाहीर केला, त्याप्रमाणे कष्टकरी व्यापाऱ्यांचाही विचार करावा, अशा भावना व्यापारी महासंघटनेने व्यक्त केल्या आहेत. शेतकरी जगला पाहिजे, त्याचप्रमाणे व्यापारीही जगला पाहिजे. व्यापाऱ्यांनाही कुटुंब, कर्ज आणि मूलभूत गरजांची जबाबदारी आहे. त्यामुळे व्यापारी वर्गाला विविध करांमध्ये सवलत किंवा शिथिलता देण्याबाबत शासनाने संकारात्मक भूमिका घ्यावी, अशी अपेक्षा व्यक्त करण्यात आली आहे.