मुंबई : बॉलिवूड अभिनेता टायगर श्रॉफच्या कारवर झालेल्या गोळीबाराच्या घटनेप्रकरणी मुंबई गुन्हे शाखेने तपासाची व्याप्ती वाढवली आहे. इंदूरमधून ११ व्या संशयिताला ताब्यात घेण्यात आले असल्याचे वृत्त आहे. हा व्यक्ती लॉरेन्स बिश्नोई टोळीशी संबंधित नेटवर्कला आर्थिक किंवा इतर प्रकारची मदत पुरवत असावा, असा संशय तपास यंत्रणांना आहे. पोलीस सध्या या संशयिताची भूमिका, इतर आरोपींशी असलेले त्याचे संबंध आणि हल्ल्याच्या आधी व नंतरच्या त्याच्या हालचालींची तपासणी करत आहेत.

सूत्रांच्या माहितीनुसार, हा तपास केवळ अभिनेत्याच्या कारवर गोळ्या झाडणाऱ्या व्यक्तींपुरताच मर्यादित नाही. ज्यांनी शस्त्रे मिळवून दिली, हल्ल्यापूर्वी रेकी केली, आरोपींच्या हालचालींमध्ये मदत केली किंवा घटनेनंतर त्यांना पळून जाण्यास सहकार्य केले अशा व्यक्तींचीही पोलीस माहिती गोळा करत आहेत. इंदूरमधून ताब्यात घेतलेल्या संशयिताची ओळख किंवा त्याची नेमकी भूमिका याबद्दल कोणतीही अधिकृत सविस्तर माहिती अद्याप देण्यात आलेली नाही.

दरम्यान, पीटीआयच्या वृत्तानुसार, मुंबई गुन्हे शाखेने गुजरातच्या सुरत शहरातून दोन शस्त्रे आणि १० काडतूसे जप्त केली आहेत. ही शस्त्रे हल्लेखोरांनी वापरली असावीत असा संशय आहे. एका अधिकाऱ्याने शनिवारी सांगितले की, शुक्रवारी एका विशेष मोहिमेअंतर्गत तपास पथकाने छापे टाकले, ज्या दरम्यान ही शस्त्रे जप्त करण्यात आली. गुन्हे शाखेच्या पथकांनी हल्लेखोरांना शस्त्रे पुरवणाऱ्या व्यक्तींविषयीही माहिती मिळवली आहे.