सावंतवाडी : उपनगराध्यक्ष ॲड. अनिल निरावडेकर यांनी विशेष सभेबाबत घेतलेल्या पत्रकार परिषदेमध्ये  ज्या पद्धतीने विविध मुद्दे मुद्देसूदपणे मांडले, त्यातून प्रत्येक मुद्द्याचे गांभीर्य स्पष्ट होते. नगरपालिकेत एकापाठोपाठ एक कथित गैरव्यवहाराचे विषय समोर येत असतील तर नगरपालिका प्रशासनाच्या कार्यपद्धतीवर आणि नगराध्यक्षाच्या नेतृत्वाच्या कार्यक्षमतेवर प्रश्नचिन्ह निर्माण होणे स्वाभाविक आहे. यामुळे कॉग्रेसच्या माध्यमातून जिल्हाधिकारी व नगरविकास खात्याकडे चौकशीची मागणी करणार असल्याचे कॉग्रेसचे माजी जिल्हाध्यक्ष ॲड समीर वंजारी यांनी सांगितले.

ते म्हणाले, जनतेने भरलेल्या कराच्या पैशांचा योग्य विनियोग होत नसेल तर हा जनतेच्या पैशांचा अपव्यय ठरत नाही का ? सत्ताधारी पक्षातील लोकप्रतिनिधीच असमाधान व्यक्त करत असतील तर प्रशासनात सर्व काही आलबेल आहे का ? विशेष सभेत ज्या जबाबदार व्यक्तींची  उपस्थिती अनिवार्य होती‌ व त्यांचे ऑडिट विषयी स्पष्टीकरण महत्त्वाचे होते. त्यांचीच अनुपस्थिती असेल, तर या सभेच्या उद्देशावर प्रश्न उपस्थित होणे साहजिक आहे. संबंधित व्यक्तींच्या अनुपस्थितीमागे नेमके काय कारण होते ? याचेही स्पष्टीकरण जनतेला मिळाले पाहिजे.

सत्ताधारी लोकप्रतिनिधीच जर नगरपालिकेतील कामकाजाबाबत गंभीर प्रश्न उपस्थित करत असतील, तर या बाबीकडे दुर्लक्ष करून चालणार नाही. नगराध्यक्षांनी नैतिक जबाबदारी स्वीकारून, उपस्थित प्रश्नांचे समाधानकारक निराकरण होईपर्यंत संबंधित वादग्रस्त कामकाजाबाबत घाईने निर्णय घेऊ नयेत. या संपूर्ण प्रकरणावर नेहमी आक्रमक असलेल्या शिवसेनेच्या जिल्हाप्रमुख संजू परब यांनी आज घेतलेल्या पत्रकार परिषदेवरून आमदार दीपक केसरकर यांनी समोपचारीची भूमिका घेण्यास बजाविले का किंवा भाग पडले का ? परब यांनी त्यावेळच्या अनेक पत्रकार परिषदेमध्ये या विषयावर आपल्याकडे अनेक पुरावे आहेत व त्यांची नावे लवकरच जनतेसमोर आणीन असे सांगितले होते. त्यामुळे जनतेच्या पैशांशी आणि नगरपालिकेच्या कारभाराशी संबंधित प्रश्नांवर त्यांनी स्पष्ट भूमिका मांडणे आवश्यक आहे.

काँग्रेस पक्ष या प्रकरणांकडे गांभीर्याने पाहत असून, लवकरच जिल्हाधिकारी आणि नगरविकास खात्याकडे सविस्तर निवेदन सादर करून संबंधित प्रकरणांची निष्पक्ष व सखोल चौकशी करण्याची मागणी करणार आहे. जनतेच्या पैशांचा विनियोग पारदर्शकपणे झाला पाहिजे आणि जबाबदार व्यक्तींनी जनतेसमोर उत्तरदायित्व स्वीकारले पाहिजे, हीच काँग्रेस पक्षाची ठाम भूमिका असल्याचे त्यांनी स्पष्ट केले आहे.