दोडामार्ग : दोडामार्ग येथील जि. प. केंद्रशाळा दोडामार्ग नं. १ मधील विद्यार्थ्यांनी सामाजिक बांधिलकी जपत स्वच्छता कर्मचाऱ्यांसोबत रक्षाबंधनाचा सण उत्साहात साजरा केला. समाजाच्या स्वच्छतेसाठी नियमितपणे मेहनत घेणाऱ्या स्वच्छता कर्मचाऱ्यांप्रती कृतज्ञता व्यक्त करण्याच्या उद्देशाने शाळेत हा उपक्रम राबविण्यात आला.
यावेळी विद्यार्थ्यांनी स्वच्छता कर्मचाऱ्यांना राखी बांधून त्यांचे औक्षण केले. तसेच त्यांच्या कार्याप्रती आदर व आपुलकी व्यक्त केली. आपल्या दैनंदिन जीवनात स्वच्छता राखण्यासाठी स्वच्छता कर्मचाऱ्यांचे मोठे योगदान असते. मात्र, त्यांच्या या महत्त्वपूर्ण कार्याची अनेकदा पुरेशी दखल घेतली जात नाही. ही जाणीव विद्यार्थ्यांमध्ये निर्माण व्हावी, या उद्देशाने रक्षाबंधनाच्या निमित्ताने हा आगळावेगळा उपक्रम घेण्यात आला.
स्वच्छता कर्मचारी हे समाजाच्या आरोग्याचे आणि स्वच्छतेचे महत्त्वाचे आधारस्तंभ आहेत. शहर, शाळा आणि परिसर स्वच्छ ठेवण्यासाठी ते दररोज मेहनत घेत असतात. त्यांच्या कार्याचा सन्मान करणे ही प्रत्येकाची सामाजिक जबाबदारी आहे, असा संदेश या उपक्रमातून विद्यार्थ्यांनी दिला.
रक्षाबंधन हा केवळ भाऊ-बहिणीच्या नात्याचा सण न राहता समाजातील विविध घटकांमधील आपुलकी, सन्मान, कृतज्ञता आणि माणुसकीचे नाते अधिक दृढ करणारा सण ठरू शकतो, हे विद्यार्थ्यांनी या उपक्रमातून दाखवून दिले.
विद्यार्थ्यांनी स्वच्छता कर्मचाऱ्यांना राखी बांधून ‘स्वच्छतेच्या सैनिकांप्रती कृतज्ञता व्यक्त केली. या उपक्रमामुळे विद्यार्थ्यांमध्ये सामाजिक जाणीव, संवेदनशीलता आणि प्रत्येकाच्या कार्याचा आदर करण्याची भावना निर्माण होण्यास मदत झाली.जि. प. केंद्रशाळा दोडामार्ग नं. १च्या या उपक्रमाचे पालक, शिक्षक आणि नागरिकांकडून कौतुक करण्यात आले.
