दोडामार्ग : सिंधुदुर्ग जिल्ह्यातील पर्यटन व्यवसायाला नवी गती देण्यासाठी आणि स्थानिक पर्यटन व्यावसायिकांच्या विविध समस्यांवर कायमस्वरूपी मार्ग काढण्यासाठी सह्याद्री कृषी पर्यटन सहकारी संस्था, सावंतवाडी यांच्या माध्यमातून लवकरच एक अत्यंत महत्त्वपूर्ण बैठक आयोजित करण्यात आली आहे. या बैठकीत कोकण विभागीय पर्यटन उपसंचालक प्रज्ञा मनोहर यांच्यासोबत जिल्ह्यातील पर्यटन सुविधा, अडचणी आणि नव्या प्रस्तावांवर सविस्तर चर्चा केली जाणार आहे.

​पर्यटन व्यावसायिकांच्या समस्यांवर थेट चर्चा

​सिंधुदुर्ग जिल्हा पर्यटनाच्या दृष्टीने अत्यंत समृद्ध असला, तरी स्थानिक व्यावसायिकांना अनेक पायाभूत सुविधा आणि प्रशासकीय अडचणींचा सामना करावा लागत आहे. या नियोजित बैठकीत प्रामुख्याने निवास-न्याहारी (होम स्टे) आणि कृषी पर्यटनाशी निगडित असलेल्या विविध परवानग्या, करांमधील सवलती आणि शासनाकडून मिळणाऱ्या सुविधांमधील अडचणी उपसंचालकांसमोर थेट मांडल्या जाणार आहेत.

​'होम स्टे' आणि नव्या प्रस्तावांना मंजुरी देण्याची मागणी

​जिल्ह्यात सध्या मोठ्या प्रमाणावर तरुण वर्ग पर्यटन व्यवसायाकडे वळत आहे. ग्रामीण भागात 'निवास न्याहारी योजना' (Home Stay) आणि 'कृषी पर्यटन केंद्र' सुरू करण्यासाठी अनेक नवीन प्रस्ताव सादर केले जाणार आहेत. हे नवे प्रस्ताव विहित वेळेत मंजूर व्हावेत, जेणेकरून स्थानिक पातळीवर रोजगार निर्मितीला वेग येईल, अशी आग्रही मागणी सह्याद्री कृषी पर्यटन सहकारी संस्थेचे पदाधिकारी या बैठकीत उपसंचालकांकडे करणार आहेत.

​सकारात्मक निर्णयाची अपेक्षा

सिंधुदुर्ग जिल्ह्यातील पर्यटन वाढीसाठी शासन स्तरावर सातत्याने प्रयत्न होत असून, या बैठकीच्या माध्यमातून प्रलंबित असणारे तसेच नव्याने येणारे सर्व कायदेशीर प्रस्ताव जलद गतीने मंजूर करण्यासाठी आवश्यक ते सहकार्य उपसंचालक प्रज्ञा मनोहर यांच्याकडून मिळेल, अशी आशा व्यक्त केली जात आहे. होम स्टे आणि कृषी पर्यटनाच्या माध्यमातून जिल्ह्याचा विकास साधण्यासाठी आणि दर्जेदार सुविधांवर भर देण्यासाठी या बैठकीत महत्त्वाचे निर्णय होण्याची शक्यता आहे.

​उद्या कुणकेरी येथे बैठकीचे आयोजन; उपस्थित राहण्याचे आवाहन

​स्थळ: सावंत फार्म ॲग्रो टुरिझम, कुणकेरी (ता. सावंतवाडी)

​दिनांक: १७ जुलै २०२६

​वेळ: सकाळी ठीक ९.०० वाजता

​या महत्त्वपूर्ण बैठकीसाठी सह्याद्री पर्यटन संस्थेचे संस्थापक, संचालक व सदस्य, तसेच जिल्ह्यातील पर्यटन प्रेमी, उद्योजक आणि नवीन पर्यटन व्यावसायिकांनी मोठ्या संख्येने उपस्थित राहून सहकार्य करावे, असे आवाहन सह्याद्री कृषी पर्यटन संस्था सावंतवाडी अध्यक्ष शिवानंद शिरोडकर उपाध्यक्ष प्रमोद सावंत आदीकडून  करण्यात आले आहे