रुपेश रटाटे : रायगडच्या राजकारणात सध्या पालकमंत्री भरत गोगावले यांच्या एका विधानाची जोरदार चर्चा सोशल मीडियापासून राजकीय वर्तुळापर्यंत सुरू आहे. ‘मला पालकमंत्री पद मिळण्यासाठी आ. अनिकेत तटकरे यांचा सिंहाचा वाटा आहे’, असे वक्तव्य गोगावले यांनी केल्याने रायगडच्या राजकीय समीकरणांकडे पुन्हा एकदा नव्या नजरेने पाहिले जात आहे.

महायुतीच्या राजकारणात शिवसेना आणि राष्ट्रवादी काँग्रेस हे सत्तेतील घटक असले, तरी रायगडमध्ये या दोन्ही पक्षांतील अंतर्गत राजकीय संघर्ष अनेकदा उघडपणे समोर आला आहे. विशेषतः तटकरे कुटुंबाविरोधात शिवसेनेतील काही नेत्यांकडून सातत्याने होणारी टीका पाहता, गोगावले यांच्या या विधानाने अनेक प्रश्न उपस्थित केले आहेत.

अलिबाग-मुरुड-रोह्याचे आमदार महेंद्र दळवी हे विविध राजकीय मुद्द्यांवर तटकरे कुटुंबावर टीका करताना दिसतात. पालकमंत्री पदाच्या मुद्द्यापासून जिल्ह्यातील विविध विकासकामांपर्यंत दळवींची भूमिका अनेकदा आक्रमक राहिली आहे. अशा परिस्थितीत पालकमंत्री गोगावले यांनीच आ. अनिकेत तटकरे यांचे पालकमंत्री पद मिळवून देण्यात ‘सिंहाचा वाटा’ असल्याचे सांगणे, हे राजकीयदृष्ट्या निश्चितच चर्चेचे ठरते.

गोगावले यांच्या म्हणण्यानुसार, आ. अनिकेत तटकरे यांना बिनविरोध निवडून येण्यासाठी सहकार्य केले गेले आणि त्याच्या बदल्यात त्यांनीही पालकमंत्री पदासाठी पाठिंबा दिला. राजकारणात परस्पर सहकार्य आणि राजकीय समन्वय नवीन नाही. मात्र, त्याच वेळी महायुतीतीलच काही नेत्यांकडून तटकरे कुटुंबावर सातत्याने टीका होत असेल, तर या विरोधाभासाकडे दुर्लक्ष कसे करायचे?

दुसरीकडे, आमदार महेंद्र थोरवे यांनीही यापूर्वी तटकरे यांच्यावर जलसिंचनाच्या कथित गैरव्यवहाराच्या मुद्द्यावरून टीका केली होती. त्यामुळे गोगावले यांच्या वक्तव्यावर महेंद्र दळवी आणि महेंद्र थोरवे यांची राजकीय भूमिका काय असेल, हा प्रश्नही आता चर्चेत आहे.

महायुती एकत्र, मग आरोप-प्रत्यारोप कशासाठी?

महायुती ही एकत्रित राजकीय ताकद असल्याचे सांगितले जाते. मग याच महायुतीतील नेत्यांकडून तटकरे कुटुंबातील नेत्यांवर वारंवार आरोप-प्रत्यारोप का केले जातात? एकीकडे सत्तेतील राजकीय समन्वय आणि दुसरीकडे सार्वजनिक व्यासपीठावर होणारी परस्पर टीका—या दोन्ही गोष्टींचा मेळ नेमका कसा घालायचा?

हा केवळ राजकीय मतभेदांचा भाग आहे की शिवसेनेच्या अंतर्गत राजकारणातच काही वेगळी समीकरणे आकार घेत आहेत? तटकरे कुटुंबाचे रायगडमधील वाढते राजकीय वजन काही नेत्यांना अस्वस्थ करत आहे का? की निवडणुकीच्या राजकारणात आरोप-प्रत्यारोप ही केवळ राजकीय रणनीती आहे?

गोगावले यांच्या वक्तव्यामुळे तटकरे कुटुंबाचे रायगडमधील राजकीय वजन पुन्हा अधोरेखित झाले आहे, असे मानायचे का, हाही प्रश्न आहे. कारण एका बाजूला तटकरे कुटुंबावर टीका करणारे शिवसेनेचे नेते आणि दुसऱ्या बाजूला त्याच कुटुंबातील आमदाराच्या सहकार्यामुळे पालकमंत्री पद मिळाल्याचे सांगणारे पालकमंत्री—हे राजकीय चित्र निश्चितच लक्षवेधी आहे.

आता खरा प्रश्न असा आहे की, महायुतीतील हे आरोप-प्रत्यारोप आगामी काळात थांबणार का? की रायगडच्या राजकारणात तटकरे विरुद्ध शिवसेना असा संघर्ष पुन्हा पुन्हा नव्या मुद्द्यांवर रंगत राहणार?

रायगडच्या जनतेला मात्र या राजकीय संघर्षापेक्षा विकास, रोजगार, उद्योग आणि मूलभूत सुविधांवरील ठोस भूमिका अधिक महत्त्वाची आहे. त्यामुळे नेत्यांमधील राजकीय समीकरणे काहीही असोत, त्याचा जिल्ह्याच्या विकासावर परिणाम होऊ नये, हीच अपेक्षा.