कणकवली : कणकवली शहरासह परिसरातील गावांच्या पाणीपुरवठ्याच्या दृष्टीने महत्त्वाच्या असलेल्या गडनदी पात्रातील कनक नगर येथील केटी बंधाऱ्यावर पाणी अडवण्यासाठी प्लेट बसवण्याच्या कामाला सुरुवात करण्यात आली आहे. लघु पाटबंधारे विभागामार्फत हे काम हाती घेण्यात आले आहे.

गडनदीतील केटी बंधाऱ्यावर प्लेट येऊन आठ दिवस झाले होते पण त्या प्लेट्स कधी बसवणार? असा प्रश्न उपस्थित करत ‘कोकणसाद Live’ ने दोन दिवसांपूर्वी बातमी प्रसिद्ध केली होती. या पार्श्वभूमीवर आता बंधाऱ्यावर प्लेट बसवण्यास सुरुवात झाल्याने नदीपात्रात पाणी अडवण्याच्या प्रक्रियेला गती मिळणार आहे.

या नदीतील पाण्यावर कणकवली शहरासह हरकुळ, हळवल, वागदे, सातरल, कासरल आणि कलमठ या गावांच्या पाणीपुरवठा याच नदीवरील पाण्याने होतो. त्यामुळे केटी बंधाऱ्यावर प्लेट बसवून पाणीसाठा करणे महत्त्वाचे ठरणार आहे.

दरम्यान, बंधाऱ्यावर प्लेट बसवण्याचे काम पूर्ण करताना कोणत्याही प्रकारे पाण्याची गळती राहणार नाही, याची विशेष दक्षता घेणे आवश्यक आहे. ठेकेदाराने प्लेट व्यवस्थित बसवून पाणी अडवण्याची प्रभावी व्यवस्था केल्यास उपलब्ध पाणीसाठा टिकवून ठेवण्यास मदत होईल. त्यामुळे संबंधित विभागाने कामाचा दर्जा आणि गळती रोखण्याकडे विशेष लक्ष द्यावे, अशी अपेक्षा नागरिकांकडून व्यक्त होत आहे.