सावंतवाडी : रेल्वे स्थानकाच्या प्रस्तावित टर्मिनस विकास आराखड्यावरून कोकण रेल्वे प्रवासी संघटनेने आक्षेप नोंदविला आहे. प्लॅटफॉर्म क्रमांक ३ लगतच्या मोकळ्या जागेत प्रस्तावित इमारत बांधकाम करण्याऐवजी भविष्यातील रेल्वे विस्तारासाठी ही जागा राखीव ठेवावी, अशी मागणी संघटनेने केली आहे. या मागणीसाठी सावंतवाडी रेल्वे स्थानकावर सह्यांची मोहीम राबविण्यात आली. त्यानंतर संकलित सह्यांसह निवेदन स्टेशनमास्तरांना सादर करण्यात आले.
सावंतवाडी रेल्वे स्थानकाचा ‘लोकमान्य प्रा. मधु दंडवते रेल्वे टर्मिनस’ म्हणून विकास करण्याच्या दृष्टीने आवश्यक पायाभूत सुविधांचा विचार करणे गरजेचे आहे. प्लॅटफॉर्म क्रमांक ३ लगतची मोकळी जागा भविष्यातील लूप लाईन, अतिरिक्त प्लॅटफॉर्म आणि स्टेबलिंग लाईनसाठी उपयुक्त ठरू शकते, अशी भूमिका प्रवासी संघटनेने मांडली आहे. या जागेवर प्रस्तावित इमारत उभारल्यास भविष्यातील यार्ड विस्ताराला अडथळा निर्माण होण्याची शक्यता संघटनेने व्यक्त केली आहे. त्यामुळे इमारत बांधकामासंदर्भात अंतिम निर्णय घेण्यापूर्वी संपूर्ण यार्ड आराखड्याचा पुनर्विचार करावा, अशी मागणी करण्यात आली आहे.
टर्मिनस विकासामध्ये केवळ इमारत उभारण्याऐवजी गाड्यांचे स्टेबलिंग, देखभाल, स्वच्छता, अतिरिक्त फलाट आणि रेल्वे वाहतूक व्यवस्थापनासाठी आवश्यक सुविधा उपलब्ध असणे गरजेचे आहे. भविष्यात सावंतवाडीहून नवीन रेल्वेसेवा सुरू करण्यासाठी तसेच विद्यमान सेवांचा विस्तार करण्यासाठी योग्य नियोजन आवश्यक असल्याचे संघटनेने नमूद केले.
प्रस्तावित बांधकामाला स्थगिती देऊन पर्यायी जागेचा विचार करावा, अशी मागणी कोकण रेल्वेचे व्यवस्थापकीय संचालक आणि स्थानिक लोकप्रतिनिधींकडे करण्यात आली आहे. यासोबतच सुधारित यार्ड आराखडा जाहीर करून प्रवासी संघटनांना विश्वासात घ्यावे, अशी मागणीही पुढे आली आहे. ट्रॅकच्या जागेत इमारतीचे बांधकाम करून टर्मिनसचा मूळ हेतू बाधित होऊ शकतो.
ही जागा रुळांच्या विस्तारासाठी राखीव ठेवून इमारतीसाठी पर्यायी जागा शोधावी. प्रवासी संघटनांना विश्वासात घेऊन सुधारित यार्ड आराखडा जाहीर करावा, अशी भूमिका कोकण रेल्वे प्रवासी संघटनेचे उपाध्यक्ष सागर तळवडेकर यांनी मांडली.सह्यांची मोहीम आणि स्टेशनमास्तरांना निवेदन सादर केल्यानंतर सावंतवाडी टर्मिनसच्या नियोजनाचा मुद्दा पुन्हा चर्चेत आला आहे. भविष्यातील रेल्वे विस्तार, अतिरिक्त फलाट आणि स्टेबलिंग सुविधांबाबत कोकण रेल्वे प्रशासन कोणता निर्णय घेते, याकडे प्रवाशांचे लक्ष लागले आहे.
