मुंबई : क्यू स्पोर्ट्समधील दिग्गज पंकज अडवाणी यांने 'डब्ल्यूबीएल वर्ल्ड बिलियर्ड्स चॅम्पियनशिप' जिंकून आपल्या कारकिर्दीतील २९ वे जागतिक विजेतेपद पटकावले. या विजयामुळे पंकज अडवाणीचे या खेळात वर्चस्व आजही कायम आहे  हे सिद्ध झाले. ४१ वर्षीय अडवाणी हे उपांत्य फेरीपर्यंत पोहोचणारे एकमेव भारतीय खेळाडू होते.

पाच तास चाललेल्या अत्यंत चुरशीच्या अंतिम सामन्यात त्यांनी इंग्लंडच्या रॉब हॉलचा १९०६–१२०६ असा पराभव केला. हा अंतिम सामना दोन्ही खेळाडूंसाठी अत्यंत महत्त्वाचा होता. कारण रॉब हॉल यापूर्वी पाच वेळा वर्ल्ड बिलियर्ड्स चॅम्पियनशिपच्या अंतिम फेरीत पोहोचले होते, परंतु प्रत्येक वेळी त्यांना विजेतेपदापासून वंचित राहावे लागले होते. दुसरीकडे, अडवाणी आपल्या अद्वितीय जागतिक विजेतेपदांच्या विक्रमात आणखी भर घालण्याचे ध्येय ठेवून होते.

अडवाणी यांनी अंतिम सामन्याची सुरुवात ९१ गुणांच्या 'ब्रेक'ने केली, परंतु रॉब हॉल यांनी २०३ गुणांचा शानदार 'ब्रेक' नोंदवत आघाडी घेतली. सामन्याच्या साधारण दोन तासांनंतर दोन्ही खेळाडू बरोबरीच्या स्थितीत होते, तेव्हा अडवाणी यांनी आणखी एक 'सेंच्युरी ब्रेक' करत आघाडी घेतली.

यानंतर अडवाणी यांनी २१० गुणांचा उत्कृष्ट 'ब्रेक' नोंदवून हॉलची आघाडी १०० गुणांपर्यंत खाली आणली. त्यानंतर लगेचच, जेव्हा त्यांच्या प्रतिस्पर्ध्याकडून एक सोपा शॉट हुकला, तेव्हा अडवाणी यांनी संधीचा पुरेपूर फायदा घेतला. त्यांनी या चॅम्पियनशिपमधील सर्वात अविस्मरणीय कामगिरी करत ५८७ गुणांचा 'ब्रेक' नोंदवला, जो यावर्षीच्या जागतिक चॅम्पियनशिपमधील सर्वोच्च 'ब्रेक' ठरला. या नेत्रदीपक कामगिरीमुळे प्रतिस्पर्ध्याच्या विजेतेपदाच्या आशा मावळल्या आणि प्रतिष्ठित ट्रॉफीवर पुन्हा एकदा अडवाणी यांचे नाव कोरले गेले.

बक्षीस वितरण समारंभात, रॉब हॉल यांनी अडवाणींच्या जबरदस्त पुनरागमनाचे आणि त्यांच्या उत्कृष्ट खेळाचे कौतुक केले. या स्पर्धेच्या सुरुवातीच्या टप्प्यात, अडवाणी यांनी उपांत्यपूर्व फेरीत सहकारी खेळाडू सौरव कोठारी यांचा ११३४–५७५ असा पराभव केला होता, तर उपांत्य फेरीत त्यांनी फॉर्ममध्ये असलेल्या डेव्हिड कॉझियरवर १६०७–१२७१ असा विजय मिळवला होता. आता अडवाणी नोव्हेंबर महिन्यात इंदूर येथे होणाऱ्या 'आयबीएसएफ वर्ल्ड स्नूकर चॅम्पियनशिप'साठी तयारी सुरू करतील.