देवगड : जिल्हास्तरीय मैदानी स्पर्धा २०२६-२७ मध्ये महात्मा गांधी विद्यामंदिर, तळेबाजार प्रशालेच्या विद्यार्थिनींनी उल्लेखनीय यश संपादन केले. या स्पर्धेत प्रशालेची विद्यार्थिनी कुमारी श्रावणी सावंत हिने ८०० मीटर धावण्याच्या प्रकारात उत्कृष्ट कामगिरी करत प्रथम क्रमांक पटकावला. या यशामुळे तिची विभागस्तरीय स्पर्धेसाठी निवड झाली आहे.

तसेच ४×१०० मीटर रिले या सांघिक धावण्याच्या प्रकारात प्रशालेच्या पूर्वा लाड, श्रावणी लाड, सेजल थोटम आणि आस्था फाटक या विद्यार्थिनींनी उत्कृष्ट समन्वय व जिद्दीच्या जोरावर तृतीय क्रमांक मिळवला. या यशामुळे प्रशालेच्या क्रीडा क्षेत्रातील कामगिरीत आणखी एक मानाचा तुरा रोवला गेला आहे. या सर्व खेळाडूंना क्रीडा शिक्षक अजित कदम यांचे मार्गदर्शन लाभले.

या यशस्वी विद्यार्थिनींचे संस्थाध्यक्ष संदीप तेली, उपाध्यक्ष राजेंद्र म्हापसेकर, खजिनदार संतोष वरेरकर, सचिव कृष्णा साटम तसेच संस्थेच्या सर्व सदस्यांनी अभिनंदन करून पुढील वाटचालीस शुभेच्छा दिल्या. प्रशालेचे मुख्याध्यापक, शिक्षक, शिक्षकेतर कर्मचारी आणि ग्रामस्थ यांनीही विद्यार्थिनींचे विशेष कौतुक केले. विद्यार्थिनींच्या या यशामागे त्यांची मेहनत, जिद्द, सातत्यपूर्ण सराव आणि मार्गदर्शन यांचा महत्त्वपूर्ण वाटा असल्याचे मत व्यक्त करण्यात आले.

या यशाबद्दल सर्व स्तरांतून विद्यार्थिनींचे अभिनंदन होत असून, विभागस्तरीय स्पर्धेसाठी निवड झालेल्या कुमारी श्रावणी सावंत हिच्याकडून पुढील स्पर्धेतही उज्ज्वल यशाची अपेक्षा व्यक्त केली जात आहे.