नवी दिल्ली : आशियाई क्रीडा स्पर्धेत मंगळवारी झालेल्या 'पूल ए' मधील दुसऱ्या सामन्यात भारतीय पुरुष हॉकी संघाने श्रीलंकेच्या संघाचा १६-१ असा दणदणीत पराभव केला. याआधी भारताने इंडोनेशियाचा १३-१ असा पराभव केला होता. ड्रॅग फ्लिकर जुगराज सिंग आणि स्ट्रायकर अभिषेक व दिलप्रीत सिंग यांच्या हॅट्ट्रिकमुळे हा विजय शक्य झाला. आता भारत आपला पुढील सामना गुरुवारी, २४ सप्टेंबर रोजी दक्षिण कोरियाविरुद्ध खेळणार आहे.

श्रीलंकेसोबत पार पडलेल्या सामन्यात भारतीय खेळाडू जुगराजने (१०, २२, ४२ आणि ५३ व्या मिनिटाला) चार गोल केले, तर अभिषेक (११, १७ आणि ४९ व्या मिनिटाला) आणि दिलप्रीत (३०, ३८ आणि ५५ व्या मिनिटाला) यांनी प्रत्येकी तीन 'फील्ड गोल' नोंदवले.

भारतीय संघाने सुरुवातीपासूनच वर्चस्व राखले आणि तुलनेने कमकुवत मानल्या जाणाऱ्या श्रीलंकेच्या संघाविरुद्ध खेळावर आपली पकड कायम ठेवली. भारताला पहिला गोल करण्यासाठी पाच मिनिटे लागली.

कर्णधार हरमनप्रीत सिंग (१६ आणि ४५ व्या मिनिटाला), मनदीप सिंग (५ व्या मिनिटाला), सुखजीत सिंग (२९ व्या मिनिटाला), मनप्रीत सिंग (३१ व्या मिनिटाला) आणि विवेक सागर प्रसाद (३६ व्या मिनिटाला) यांनीही गोल केले. श्रीलंकेचा एकमेव गोल ५० व्या मिनिटाला सुरेश रत्नायकेने केला. आशियाई क्रीडा स्पर्धेच्या इतिहासात भारता विरुद्धचा श्रीलंकेचा हा पहिलाच गोल ठरला. भारतासाठी चार गोल करणारा ड्रॅग-फ्लिकर जुगराज सिंग आपल्या कामगिरीवर अत्यंत आनंदी आहे.