सावंतवाडी : येत्या २४ मार्च २०२६ रोजी होणाऱ्या 'मेगा मल्टीस्पेशालिटी आरोग्य शिबिरा'च्या पार्श्वभूमीवर, सावंतवाडी उपजिल्हा रुग्णालयात पूर्व स्क्रीनिंग (तपासणी) कॅम्प उत्साहात पार पडला. या कॅम्पच्या माध्यमातून आगामी मुख्य शिबिरासाठी रुग्णांची प्राथमिक तपासणी करून त्यांना पुढील उपचारांसाठी मार्गदर्शित करण्यात आले.
या विशेष पूर्व तपासणी शिबिराचे उद्घाटन नगरसेवक तथा पाणी पुरवठा सभापती प्रतीक बांदेकर यांच्या हस्ते करण्यात आले. यावेळी बोलताना बांदेकर यांनी नागरिकांना या सुवर्णसंधीचा लाभ घेण्याचे आवाहन केले. तज्ञ डॉक्टरांच्या मार्गदर्शनाखाली होणारे हे शिबिर सर्वसामान्यांसाठी अत्यंत महत्त्वाचे असून, जास्तीत जास्त रुग्णांनी आपली नावनोंदणी करून तपासणी करून घ्यावी, असे ते म्हणाले.
या प्रसंगी वैद्यकीय क्षेत्रातील अनेक मान्यवर उपस्थित होते. वैद्यकीय अधीक्षकः डॉ. ज्ञानेश्वर ऐवळे, तज्ञ डॉक्टर: डॉ. देसाई, डॉ. अवधूत, डॉ. रेड्डी, डॉ. सागर जाधव, डॉ. अटक. तसेचः टी.एम.ओ ऑफिस कर्मचारी, प्राथमिक आरोग्य कर्मचारी आणि व्यापारी श्री. मुंज यांची प्रमुख उपस्थिती होती. २४ मार्च रोजी होणाऱ्या महाशिबिरामध्ये विविध व्याधींवरील नामांकित तज्ञ डॉक्टर रुग्णसेवा देणार आहेत. यामध्ये प्रामुख्याने खालील विभागांचे तज्ञ उपलब्ध असतील हृदयरोग तज्ञ, कर्करोग (कॅन्सर) तज्ञ, मधुमेह व हार्मोन तज्ञ, स्त्रीरोग तज्ञ, युरोलॉजिस्ट (मूत्रविकार तज्ञ), हाडांचे तज्ञ (ऑर्थोपेडिक) जनरल सर्जन या पूर्व तपासणी कॅम्पमुळे कोणत्या रुग्णाला कोणत्या तज्ञाच्या मार्गदर्शनाची गरज आहे, हे निश्चित करण्यात आले असून, यामुळे मुख्य शिबिराच्या दिवशी होणारी गर्दी टाळून रुग्णांना शिस्तबद्ध पद्धतीने उपचार मिळण्यास मदत होणार आहे. उपलब्ध सुविधांचा लाभ घेण्याचे आवाहन प्रशासनाकडून करण्यात आले आहे.
