वेंगुर्ला : वेंगुर्ला बंदरात गुरुवार दिनांक २३ मे रोजी रात्री ९ वाजण्याच्या सुमारास वादळी वाऱ्यावेळी होडी बुडाली. यावेळी तात्काळ भाजपा युवा मोर्चा प्रदेश उपाध्यक्ष विशाल परब यांनी घटनास्थळी भेट देत स्थानिक ग्रामस्थांसह प्रशासनाशी संवाद साधला.
काल रात्री ८.३० वाजण्याच्या सुमारास ढगांचा गडगडात आणि विजांचा लखलखाट करत वादळी वाऱ्यासह जोरदार पाऊस झाला. याच दरम्यान वेंगुर्ले बंदर येथून एका छोट्या होडीत माशांसाठी लागणारा बर्फ व अन्य साहित्य घेऊन सात खलाशी मोठ्या लॉन्चवर जाण्यासाठी निघाले होते. मात्र नऊ वाजण्याच्या सुमारास आलेल्या वादळी वाऱ्यामुळे होडी भरकटली आणि समुद्राच्या पाण्यात उलटली. यावेळी होडीवर असलेले ७ खलाशी साहित्यासह समुद्राच्या पाण्यात पडले. त्यातील तीन खलाशी हे पोहून किनाऱ्यापर्यंत पोहोचले. यातील ३ खलाशी बेपत्ता असून एकाचा मृतदेह मिळाला आहे.
या पार्श्वभूमीवर आज भाजपा युवा मोर्चा प्रदेश उपाध्यक्ष विशाल परब यांनी घटनास्थळी भेट देत परिस्थितीचा आढावा घेत प्रशासनाशी चर्चा केली. यावेळी भाजपा जिल्हा उपाध्यक्ष प्रसन्ना उर्फ बाळु देसाई, तालुकाध्यक्ष सुहास गवंडळकर, तालुका सरचिटणीस बाबली वायंगणकर, किसान मोर्चाचे बाळु प्रभु, युवा मोर्चाचे प्रणव वायंगणकर, मनोहर तांडेल, मच्छिमार सेलचे वसंत तांडेल, दादा केळुसकर, ओबीसी सेलचे शरद मेस्त्री, प्रमोद वेर्णेकर, युवा मोर्चाचे गौरव खानोलकर आदी उपस्थित होते.
