चिपळूण : "मी चिपळूणकरांना भाषण देण्यासाठी आलो नाही, तर शहर स्वच्छ करण्यासाठी आलो आहे," अशा शब्दांत प्रसिद्ध सिने-नाट्य अभिनेता आणि चिपळूण नगर परिषदेचे स्वच्छता दूत ओंकार भोजने यांनी प्लास्टिकमुक्त मोहिमेच्या शुभारंभाला प्रेरणादायी सुरुवात केली. प्रांत कार्यालय, चिपळूण नगर परिषद व प्रशासन यांच्या संयुक्त विद्यमाने स्वच्छ सर्वेक्षण २०२५, माझी वसुंधरा अभियान ६.० व प्लास्टिकमुक्त चिपळूण उपक्रम अंतर्गत शुक्रवारी हा भव्य कार्यक्रम पार पडला.

एकाच वेळी ११ ठिकाणी राबवली स्वच्छता मोहीम

प्रांताधिकारी आकाश लिगाडे व मुख्याधिकारी विशाल भोसले यांच्या मार्गदर्शनाखाली चिपळूण शहरात ११ ठिकाणी एकाच वेळी स्वच्छता मोहीम राबवण्यात आली. यासाठी अकरा टीम तयार करण्यात आल्या. तीन हजारहून अधिक विद्यार्थी, विविध सामाजिक संस्था, शाळा, महाविद्यालये, व्यापारी, राजकीय प्रतिनिधी, तसेच सामान्य नागरिक रस्त्यावर उतरले. या अनोख्या उपक्रमाला शहरवासीयांचा भरघोस प्रतिसाद मिळाला.

ओंकार भोजने यांचा उत्स्फूर्त सहभाग, घंटागाडीतून जनजागृती

अभिनेता ओंकार भोजने यांनी चिपळूण नगर परिषद येथे आयोजित उद्घाटन सोहळ्यानंतर घंटागाडीतून जनजागृती करत व्यापाऱ्यांना प्लास्टिकमुक्तीचे पत्रक वाटप केले. त्यांच्यासह नगरसेवक, प्रशासकीय अधिकारी व कर्मचारी शहरभर फिरले. यावेळी विविध ठिकाणी 'नो प्लास्टिक झोन' ची निर्मितीही करण्यात आली.

शब्द नव्हे कृतीची गरज  : ओंकार भोजने

“मी केवळ ब्रँड अँबेसिडर नसून या चळवळीचा एक कार्यकर्ता आहे. चिपळूणमधील प्रत्येक सुजाण नागरिक या मोहिमेचा खरा ब्रँड अँबेसिडर आहे,” असे उद्गार त्यांनी काढले. “स्वच्छता ही केवळ सरकारी जबाबदारी नसून प्रत्येकाची व्यक्तिगत बांधिलकी आहे. तरुणांनी कला, साहित्य, क्रीडा अशा सर्व क्षेत्रांतून पुढे येऊन स्वच्छतेच्या लढ्यात सामील व्हावे,” असेही त्यांनी नमूद केले.

समारोप कार्यक्रमात आमदारांचा सहभाग आणि कौतुक

इंदिरा गांधी सांस्कृतिक केंद्रात पार पडलेल्या समारोप कार्यक्रमात आमदार शेखर निकम यांनी स्वतः हजेरी लावली. प्रांताधिकारी व मुख्याधिकाऱ्यांच्या कार्यपद्धतीचे कौतुक करत त्यांनी सांगितले की, “विद्यार्थ्यांचा सहभाग महत्त्वाचा आहे. स्वच्छतेविषयी निबंध व वक्तृत्व स्पर्धा घेऊन जनजागृती वाढवू. जे जे शक्य असेल ते सहकार्य करू.”

ओंकार भोजने यांना ब्रँड अँबेसिडर म्हणून नियुक्ती

या कार्यक्रमात अभिनेता ओंकार भोजने यांना स्वच्छतेचा अधिकृत ब्रँड अँबेसिडर म्हणून नियुक्तीपत्र देण्यात आले. “ही केवळ सन्मानाची गोष्ट नसून जबाबदारी आहे. मी सातत्याने चिपळूणमध्ये येत राहीन आणि नवनवीन उपक्रम हाती घेईन,” अशी ग्वाही त्यांनी दिली.

वृक्षारोपण आणि देवराई भेट

या उपक्रमांतर्गत गांधाधारेश्वर तिठा येथे वृक्षारोपण करण्यात आले. यावेळी डॉ. यतीन जाधव, प्रकाश देशपांडे, कवी अरुण इंगवले आदी मान्यवर उपस्थित होते. त्यानंतर प्रांताधिकारी आकाश लिगाडे यांच्या संकल्पनेतून कळंबस्ते येथे उभारण्यात येणाऱ्या देवराईला ओंकार भोजने यांनी भेट दिली. त्यांच्यासोबत मुख्याधिकारी विशाल भोसले उपस्थित होते.

या उपक्रमात माजी नगरसेवक आशिष खातू, रामशेठ रेडीज, सीमा चाळके, मनोज शिंदे, रसिका देवळेकर, मिलिंद कापडी, शहानवाज शहा यांच्यासह सर्वपक्षीय आजी-माजी नगरसेवक सहभागी झाले होते. कार्यक्रमाचे सूत्रसंचालन सुजित जाधव यांनी केले.

 विशेष लक्षवेधी गोष्टी:

चिपळूण शहरात एकाच दिवशी ११ ठिकाणी स्वच्छता मोहीम

३,००० पेक्षा अधिक विद्यार्थ्यांचा सहभाग

'नो प्लास्टिक झोन' ची निर्मिती

वृक्षारोपण आणि देवराईला भेट

अभिनेता ओंकार भोजने यांना ब्रँड अँबेसिडर म्हणून नियुक्ती

चिपळूणच्या स्वच्छतेची मशाल आता पेटली असून, ही चळवळ थांबणार नाही : ओंकार भोजने