मालवण : पाणी फाउंडेशन फार्मर कप अंतर्गत मौजे डिकवल येथे मंगळवार, दि. २ जून २०२६ रोजी 'श्री समर्थ शेतकरी गटा'च्या वतीने शेतीसाठी अत्यंत पूरक आणि महत्त्वपूर्ण अशा विविध मोहिमांचे यशस्वी आयोजन करण्यात आले. आगामी हंगामाच्या पार्श्वभूमीवर गावात सुरू असलेल्या या उपक्रमांमुळे शेतकऱ्यांमध्ये नवचैतन्य निर्माण झाले आहे.

या उपक्रमांतर्गत प्रामुख्याने नैसर्गिक शेतीला चालना देणारा दशपर्णी अर्क तयार करणे, आगामी खरीप हंगामासाठी बियाणांची उगवण क्षमता चाचणी घेणे आणि जमिनीचे आरोग्य जपणारे मृदा परीक्षण  या अत्यंत महत्त्वाच्या मोहिमा राबवण्यात आल्या.

या प्रसंगी उपस्थित शेतकऱ्यांना मार्गदर्शन करताना मुख्य मार्गदर्शक व उपकृषी अधिकारी मा. श्री. डी. डी. गावडे साहेब यांनी गट शेतीचे महत्त्व अधोरेखित केले. ते म्हणाले की,  "सध्याच्या काळात शेतकऱ्यांनी एकत्र येऊन गट शेती करणे ही काळाची गरज आहे. गटाच्या माध्यमातून एकत्रित बियाणे, खते व इतर निविष्ठांची खरेदी केल्यास उत्पादन खर्चात मोठी बचत होते."

यासोबतच त्यांनी गटामार्फत राबवल्या जाणाऱ्या विविध मोहिमा कशा प्रकारे यशस्वी कराव्यात, याचे सविस्तर व तांत्रिक मार्गदर्शन शेतकऱ्यांना केले.

या महत्त्वपूर्ण कार्यक्रमाला उपकृषी अधिकारी डी. के. सावंत साहेब, 'आत्मा'चे बी.टी.एम. (BTM)  गोसावी साहेब आणि सहाय्यक कृषि अधिकारी  नितेश पाताडे प्रामुख्याने उपस्थित होते. उपस्थित सर्वच मान्यवरांनी शेतकऱ्यांना रासायनिक शेतीकडून शाश्वत आणि सेंद्रिय शेतीकडे वळण्याचे आवाहन केले.

या मोहिमेमध्ये 'श्री समर्थ शेतकरी गटा'चे सर्व सदस्य आणि डिकवल परिसरातील बहुसंख्य शेतकरी उत्साहाने सहभागी झाले होते. पाणी फाउंडेशन फार्मर कपच्या या माध्यमातून गावात निसर्गाला पूरक अशा शेती पद्धतीचा अवलंब करण्यावर सर्वांनी भर दिला आहे.