
सावंतवाडी : सामाजिक बांधिलकी प्रतिष्ठानच्या माध्यमातून सावंतवाडी शहरातील तसेच झाराप हायवे, इन्सुली मेट, मळगाव मेट येथील रस्त्यावरील धोकादायक झाडे तोडण्याकरिता प्रांताधिकारी व वन विभाग अधिकारी यांना 27 मे रोजी निवेदन दिले होते. शहरातील रस्त्याच्या बाजूला जीर्ण झालेली झाडे, रस्त्यावर झुकलेल्या धोकादायक फांद्या तात्काळ तोडून घ्या जेणेकरुन पावसामध्ये पुन्हा कुठल्याही प्रकारची जीवित हानी होऊ नये अशी विनंती निवेदनाद्वारे केली होती. तसेच आपत्कालीन परिस्थितीमध्ये सामाजिक बांधिलकी प्रतिष्ठानचे आपल्याला पूर्णपणे सहकार्य लाभेल असेही आश्वासन सामाजिक बांधिलकी प्रतिष्ठानच्या माध्यमातून देण्यात आले. सामाजिक बांधिलकीच्या कार्याची दखल घेऊन प्रशासनाने पावसाआधी कार्यवाही सुरु केली आहे. यासाठी सामाजिक बांधिलकी प्रतिष्ठानकडून सदर अधिकाऱ्यांचे आभार मानण्यात आले. यावेळी सामाजिक बांधिलकी प्रतिष्ठानचे अध्यक्ष सतीश बागवे, उपाध्यक्ष शैलेश नाईक, सचिव समीरा खलील व रवी जाधव उपस्थित होते.