कणकवली : उपजिल्हा रुग्णालय येथे सध्या स्त्रीरोगतज्ञ डॉ. अर्पिता आचरेकर या कार्यरत आहेत. मात्र, या रुग्णालयात येणा-या गरोदर मातांवर उपचार न करता त्यांना विनाकारण त्रास देण्याचा सातत्याने प्रयत्न करीत आहेत. याबाबत आमच्याकडे अनेक महिलांच्या तक्रारी आलेल्या आहेत. डॉ. अर्पिता आचरेकर यांच्या उध्दटपणाच्या वर्तणुकीमुळे महिलांना त्रास सहन करावा लागत आहे. कंत्राटी पद्धतीने डॉ.आचरेकर या रुग्णालयात कार्यरत असुन त्यांची नियुक्ती तात्काळ रद्द करण्यात यावी अशी मागणी शिवसेना महिला आघाडीने केली आहे.
कणकवली उपजिल्हा रुग्णालयात मालवण , कणकवली , वैभववाडी व कुडाळ अशा 4 तालुक्यातील रुग्ण उपचारासाठी येत असतात. या रुग्णालयात महिला प्रसुतीपुर्व तपासणी आणि प्रसुती उपचारासाठी दाखल होतात. मात्र त्या महिलांना डॉ. अर्पिता आचरेकर सेवेत असुन देखील उपचार करण्याकडे दुर्लक्ष करीत आहेत. दाखल रुग्णांना स्वत: तपासणी न करताच ओरोस किंवा कुडाळ या सरकारी रुग्णालय आणि खाजगी रुग्णालयात जाण्याचा सल्ला देतात. त्यामुळे सर्वसामान्य गोरगरीब महिलांना खाजगी रुग्णालयात उपचार घ्यावे लागल्यामुळे कर्जबाजारी होण्याची वेळ आली आहे. याबद्दल महिला शिवसेनेच्यावतीने जिल्हाप्रमुख वर्षा कुडाळकर यांच्या मार्गदर्शनाखाली तालुकाप्रमुख प्रिया टेंबकर यांनी कणकवली उपजिल्हा रुग्णालय अधिक्षक डॉ. अनिकेत किर्लोस्कर यांना निवेदन दिले आहे.यावेळी उपजिल्हाप्रमुख सरीता राऊत उपस्थित होत्या.