मालवण : छत्रपती शिवाजी महाराज जयंतीनिमित्ताने सिंधुदुर्ग जिल्ह्यातील सिंधू रनर टीमने एक आगळावेगळा उपक्रम राबवला. शिवजयंतीनिमित्त सिंधू रनर टीमने किल्ले सिंधुदुर्ग (मालवण) ते सावंतवाडी (आरमार) सुमारे 66 किलोमीटर अंतर 22 धावकांनी न थांबता तब्बल ७ तास आणि ४० मिनिटात हाती शिवज्योत घेऊन पार केले. 

 सिंधुदुर्ग तसेच कोल्हापूर, रत्नागिरी या जिल्ह्यातून अनेक शिवप्रेमी किल्ले सिंधुदुर्ग (मालवण) येथून शिवज्योत प्रज्वलित करून आपापल्या शहरात जातात. यावर्षी सिंधुदुर्ग जिल्ह्यातील सिंधू रनर टीमने ही ज्योत सलग धावून आणि सुरवात ते शेवट म्हणजे मालवण ते सावंतवाडी हे ६६ किलोमीटर अंतर तब्बल ७ तास आणि ४० मिनिटात पूर्ण करून नवीन इतिहास घडवला. एकत्रितरित्या एवढे लांबचे अंतर मशाल हाती घेऊन धावणारे शिवरायांचे पहिले मावळे ठरले.

१८ फेब्रुवारी २०२४ रोजी रात्री १०:३० वाजता हे धावक शिवज्योत घेऊन मालवणवरून सावंतवाडी करीत निघाले.  यावेळी प्रोत्साहन देण्यासाठी शिल्पा यतीन खोत, युवती सेना कुडाळ मालवण विधानसभाप्रमुख, यतीन खोत माजी नगरसेवक मालवण नगरपालिका, ह्यूमन राईट्स अससोसिएशन मालवण तालुका अध्यक्ष सुधीर धुरी आणि इतर मान्यवर उपस्थित होते. मालवणहून निघाल्यानंतर चौके, कट्टा, ओरोस, कुडाळ, झारापमार्गे १९ फेब्रुवारी २०२४ रोजी सकाळी ८:०० वाजता हे सर्व धावक सावंतवाडीमध्ये दाखल होताच त्यांचे स्वागत सावंतवाडी तालुका जुडो कराटे असोसिएशन अध्यक्ष वसंत जाधव आणि त्यांच्या लहान कराटेवीरांनी केले. गवळी तिठा येथून ही मशाल घेऊन सावंतवाडीतील जुडो कराटे प्रक्षिक्षण घेणारी लहान मुले आणि सिंधू रनर टीमचे धावक यांनी संपूर्ण मोती तलावा भोवती फिरवून, याची सांगता सावंतवाडी राजवाडा येथे केली. सावंतवाडी संस्थानचे युवराज लखमराजे भोसले यांनी या साहसी उपक्रमात सहभागी सर्व धावकांचा सत्कार सन्मानचिन्ह देऊन केला. सावंतवाडी संस्थानच्या युवराज्ञी सौ श्रध्दाराजे भोसले यांनी या साहसी उपक्रमात सहभागी सर्व लहान मुलांचा सत्कार मेडल देऊन केला. तसेच ही शिवज्योत सतत तेवत राहावे म्हणून एक प्रतीकात्मक दिवा या मशालवरून प्रज्वलित करून सावंतवाडी राजवाडा इथं ठेवण्यात आला.

या साहसी आणि ऐतिहासिक रनमध्ये ओंकार पराडकर, डॉ. स्नेहल गोवेकर, भूषण बान्देलकर, भूषण पराडकर, प्रशांत शिरगावकर, देवबा देसाई, रसिक परब, महेश शेटकर, अजित दळवी, भावेश माळी, फ्रँकी गोम्स, मेघराज कोकरे, विनायक पाटील, प्रशांत बांदेकर, रेश्मा कदम, प्रथमेश कदम, मॅक्स डिसोझा, प्रशांत माळकर, मिलिंद फर्नांडिस, निखिल तेंडोलकर, प्रज्योत राणे, आकाश पार्सेकर, करण पांचाळ आणि विनायक सरमळकर इत्यादी धावक सहभागी झाले होते. वरील उपक्रमाबद्दल या सर्व टीम मेंबर्सचे कौतुक होत आहे.