मालवण : मालवण मतदारसंघ हा खासदार नारायण राणे यांचा आहे. शिंदे सेनेचे अस्तित्व देखील राणे आणि प्रदेशाध्यक्ष रवींद्र चव्हाण यांच्या नेतृत्वामुळेच जिल्ह्यात निर्माण झाले आहे. त्यामुळे मित्रपक्षाने एक पाऊल मागे घ्यावे आणि भाजपाचा नगराध्यक्ष आणि १६ नगरसेवक उमेदवार आणि शिंदे सेनेला ४ हा फॉर्म्युला स्वीकारत भाजपच्या नेतृत्वाखालील युतीत सामील व्हावे असे आवाहन भाजप शहर मंडल अध्यक्ष बाबा मोंडकर यांनी आज रात्री आयोजित पत्रकार परिषदेत केले.
हॉटेल महाराजा येथे पत्रकार परिषद झाली. यावेळी भाजपचे तालुकाध्यक्ष धोंडी चिंदरकर, मंदार केणी, बाबा परब, विजय केनवडेकर, महेश मांजरेकर यांच्यासह अन्य पदाधिकारी उपस्थित होते.
श्री. मोंडकर म्हणाले, खासदार नारायण राणे यांनी जाहीर केले होते की, जिल्ह्यातील सर्व स्थानिक स्वराज्य संस्थांचे अध्यक्ष भारतीय जनता पार्टीचे असतील. याच भूमिकेनुसार मालवण नगर परिषदेचा नगराध्यक्ष देखील भाजपचाच असला पाहिजे आणि पक्षाचे त्यावर शिक्कामोर्तब झाले आहे. काल महायुती संदर्भात झालेल्या चर्चेदरम्यान शिंदे सेनेने १२ नगरसेवक आणि नगराध्यक्ष आपला असावा अशी मागणी केली होती तर भाजपने मित्र पक्षाचा सन्मान राखून शिंदे सेनेला ४ जागा आणि नगराध्यक्षपद भाजपचा असा प्रस्ताव वरिष्ठांकडे मंजुरीसाठी पाठवला आहे. गेल्या २५ वर्षांचा इतिहास पाहता नारायण राणे यांनी मित्रपक्षाला दोनपेक्षा जास्त जागा दिल्या नव्हत्या. त्यामुळे त्यांचा हा फॉर्म्युला यापुढेही जिल्ह्यात असावा अशी सर्व पदाधिकारी, कार्यकर्त्यांची अपेक्षा आहे. शिंदे सेनेकडे सध्या मालवणमध्ये शून्य नगरसेवक असतानाही भाजपने चार जागा देण्याची तयारी दाखवली आहे. भाजपच्या कोअर कमिटीने शिंदे सेनेसोबतच्या युतीमधील संघनात्मक अडचणी ठळकपणे समोर आणताना गेल्या वर्षभरात आमदार निधी आणि खासदार निधीच्या वाटपामध्ये युतीचा धर्म पाळला नाही. विकासकामांमध्ये भाजपला सन्मानाची अपेक्षा पूर्ण झाली नाही असे श्री. मोंडकर यांनी स्पष्ट केले.
महायुतीच्या चर्चेत गुंता कायम असला तरी भाजपने निवडणुकीची तयारी पूर्ण केली आहे. पक्षाकडे नगरसेवकांच्या २० जागांसाठी ५२ अर्ज प्राप्त झाले तर नगराध्यक्ष पदासाठी ८ अर्ज प्राप्त झाले. अशा स्थितीत मित्र पक्षाला विश्वासात घेऊन भाजपला नगराध्यक्ष व १६ जागा तर शिंदे शिवसेनेला ४ जागा देण्याचा अहवाल वरिष्ठांना पाठविला आहे. यात ओरोस येथे पालकमंत्री नितेश राणे, संयोजक माजी आमदार प्रमोद जठार, जिल्हाध्यक्ष प्रभाकर सावंत, संघटन मंत्री शैलेंद्र दळवी यांच्या उपस्थितीत ६० जणांच्या मुलाखती पूर्ण झाल्या आहेत. खासदार नारायण राणे, प्रदेशाध्यक्ष रवींद्र चव्हाण, जिल्हाध्यक्ष प्रभाकर सावंत यांच्या नेतृत्वाखाली पालिकेच्या निवडणुकीसाठी कामाला सुरुवात केली आहे. त्यामुळे खासदार राणे यांचा सन्मान राखला जावा यासाठी मित्र पक्ष शिंदे शिवसेनेने १६-४ चा फॉर्म्युला स्वीकारत महायुतीत सहभागी व्हावे असे आवाहनही श्री. मोंडकर यांनी केले.
शहरातील चिवला बीच येथे घडलेल्या घटनेमुळे ख्रिस्ती बांधवांच्या भावना दुखावल्या गेल्या आहेत. या घटनेचा भारतीय जनता पार्टी शहराच्या वतीने तीव्र शब्दांत निषेध करण्यात आला आहे. समाजात तेढ निर्माण करण्याचा प्रयत्न करणाऱ्यांवर कठोर कारवाई करावी, अशी मागणी भाजपने केली आहे.
मालवण शहर सांघिक दृष्ट्या प्रत्येक समाजबांधवांमध्ये गुंतलेले असून आम्ही सर्वजण गुण्यागोविंदाने नांदत आहोत. समाजात दुफळी निर्माण करण्याचा किंवा तेढ पसरवण्याचा कोणीही प्रयत्न करत असेल तर तो यशस्वी होणार नाही. विशेषतः निवडणुकीच्या तोंडावर असे कृत्य करून कोणालाही यश मिळणार नाही, असे स्पष्ट मत श्री. मोंडकर यांनी व्यक्त केले.
भाजप पदाधिकाऱ्यांनी या घटनेची माहिती राज्याच्या यंत्रणेला दिली असून पालकमंत्री नितेश राणे यांच्याशी देखील चर्चा केली आहे. घडलेल्या घटनेचा आम्ही निषेध करतो आणि संपूर्ण आमच्या राज्य सरकारच्या माध्यमातून यंत्रणेला विनंती करत आहोत की त्यांनी संबंधीत व्यक्तीचा शोध घेत कडक कारवाई करावी. पालकमंत्र्यांनी या संदर्भात स्थानिक पोलीस ठाण्यास सूचना दिल्या आहेत असेही श्री. मोंडकर यांनी सांगितले.
