सावर्डे : हुतात्मा दिन म्हणजेच महात्मा गांधी स्मृतिदिन याचे औचित्य साधून समाजामध्ये स्वच्छतेची जाणीव जागृती व्हावी या उद्देशाने सह्याद्री शिक्षण संस्था संचलित गोविंदराव निकम माध्यमिक उच्च माध्यमिक विद्यालयातील इयत्ता नववीच्या विद्यार्थ्यांनी जीवनातील स्वच्छतेचे महत्व या विषयावर सावर्डे बस स्थानक परिसरात पथनाट्याचे सादरीकरण केले. निरोगी जीवनासाठी स्वच्छतेचे महत्व जीवनामध्ये अनन्यसाधारण असून महात्मा गांधीजींनी आपल्या जीवनात वैयक्तिक शारीरिक मानसिक व सामाजिक स्वच्छतेला अतिशय महत्त्व दिले होते त्याची माहिती सर्वसामान्यांना व्हावी व निरोगी जीवन जगता यावे या उद्देशाने या पथनाट्याचे आयोजन करण्यात आले होते.
गांधी तीर्थ जळगाव यांच्या स्वच्छता उपक्रमांतर्गत सावर्डे विद्यालयामध्ये पानवटा स्वच्छता, वैकुंठ भूमी स्वच्छता, समाज मंदिरे व सार्वजनिक ठिकाण स्वच्छता, प्रभात फेरी यासारखे विविध उपक्रम राबवले जातात आणि प्रत्यक्ष कृतीतून समाजामध्ये जागृती निर्माण करण्याचा प्रयत्न केला जातो याचाच एक भाग म्हणून विद्यालयातील विद्यार्थ्यांनी जीवनातील स्वच्छतेचे महत्व या विषयावर पथनाट्याचे सादरीकरण करून जनजागृती करण्याचा प्रयत्न केला आहे. त्याचबरोबर सावर्डे बाजारपेठ परिसरात विद्यार्थ्यांनी स्वच्छता करून जनजागृती करण्याचा प्रयत्न केला व जीवनातील स्वच्छतेचे महत्व या विषयावर सादर केलेल्या अतिशय शिस्तबद्ध पथनाट्याचे सावर्डे परिसरातून कौतुक होत आहे. या पथनाट्यातून शारीरिक व घराघरात स्वच्छता ठेवणे आवश्यक आहे याची माहिती प्रेक्षकांना मिळाली.या पथनाट्याला विद्यालयाचे प्राचार्य राजेंद्र वारे, उपप्राचार्य विजय चव्हाण पर्यवेक्ष उद्धव तोडकर यांचे मार्गदर्शन मिळाले. विद्यालयातील अविनाश पोतदार अमृता घाग व नेहा मिस्त्री यांनी सक्रिय सहभाग नोंदवला.
