सावंतवाडी : सावंतवाडी रोड रेल्वे स्थानकाचे ९ वर्षांपूर्वी "सावंतवाडी रेल्वे टर्मिनस" भूमिपूजन होवूनही सार्वजनिक बांधकाम विभागाने स्थानक सुशोभीकरणावेळी " सावंतवाडी रोड " असा फलक लावला. याला सावंतवाडी रेल्वे प्रवासी संघटनेने आक्षेप घेत सार्वजनिक बांधकाम मंत्री तथा जिल्ह्याचे पालकमंत्री रवींद्र चव्हाण यांचे लक्ष वेधले आहे. सावंतवाडी रेल्वे प्रवासी संघटनेचे अध्यक्ष अँड. संदीप निंबाळकर, सचिव मिहीर मठकर, माजी नगराध्यक्ष बबन साळगावकर, सागर तळवडेकर आदींनी सार्वजनिक बांधकाम मंत्री, कोकण रेल्वे व्यवस्थापकीय संचालक, सार्वजनिक बांधकाम विभाग, जिल्हाधिकारी आदींचे निवेदनाद्वारे लक्ष वेधले आहे.
या म्हटले आहे की, सावंतवाडी रेल्वे टर्मिनसचे भूमिपूजन २७ जून २०१५ रोजी मुख्यमंत्री देवेंद्र फडणवीस, केंद्रीय रेल्वेमंत्री सुरेश प्रभू यांच्या हस्ते तर पालकमंत्री दीपक केसरकर, खासदार विनायक राऊत आणि मान्यवरांच्या उपस्थितीत झाले आहे. त्यानंतर पहिल्या टप्प्यातील कामे पूर्ण झालीत. त्यावेळी "सावंतवाडी रेल्वे टर्मिनस" नावाची भूमिपूजन कोनशिला आवारात बसविण्यात आली. दरम्यान सार्वजनिक बांधकाम विभागाने बाह्य सुशोभीकरण केले. तेथे "सावंतवाडी रोड" अशा स्वरूपाचा सुशोभीकरणानंतर फलक लावण्यात आलेला आहे.
सार्वजनिक बांधकाम विभाग तर्फे बाह्य सुशोभिकरणाचे काम पूर्ण झाले आहे. याचे उद्घाटन या आठवड्यात अपेक्षित आहे. त्या अनुषंगाने, सार्वजनिक बांधकाम विभागाने स्थानक परिसरात नाम फलक लावण्यात आला आहे त्यावर "सावंतवाडी रोड" असा उल्लेख करण्यात आला आहे. जो काही अंशी चुकीचा आहे. कारण, त्या ठिकाणी टर्मिनसचे उद्घाटन झालेले आहे. कोकण रेल्वेच्या दफ्तरी देखील सावंतवाडी टर्मिनस असा उल्लेख कागदोपत्री करण्यात येत असल्याचे निर्दशनास आहे. चूकभूल लक्षात घेऊन ''सावंतवाडी रेल्वे टर्मिनस'' असा बदल व्हावा असे या निवेदनात म्हटले आहे.
सावंतवाडी रेल्वे टर्मिनसचे नामकरण हे कोकण रेल्वेचे शिल्पकार कै. प्रा. मधु दंडवते यांचा नावे करावे अशी मागणी सातत्याने जनतेतून होत आहे. त्यासाठी पाठपुरावा सुरू केला आहे. सावंतवाडी रेल्वे टर्मिनस दर्जाची कामे व्हावीत तसेच अधिकच्या रेल्वे गाड्यांना थांबा, पाणी भरण्याची सुविधा आणि इतर प्रवासी सुविधांची निर्मिती झाली पाहिजे. त्यासाठी स्वतंत्र निवेदन दिली आहेत. तसेच आंदोलन छेडले, जनजागृती सोशल मीडियाच्या माध्यमातून सुरू केली आहे. यासाठी यापुढेही आंदोलने छेडण्यात येणार आहेत, असे त्यांनी म्हटले आहे.
