
कणकवली : तालुक्यातील एका गावातील अल्पवयीन मुलीला फूस लावून पळवून नेणाºया दीपक जोतिराम माने (२४, रा. पांडवळ, हातखांबा) याला मुलीसह कणकवली पोलिसांनी (हातखंबा, जि.रत्नागिरी) येथून ताब्यात घेतले. पोलीस निरीक्षक अतुल जाधव यांच्या मार्गदर्शनाखाली पीएसआय उल्हास जाधव, महिला पोलीस कॉन्स्टेबल प्रणाली जाधव यांनी ही कामगिरी पार पाडली.
४ जुलै रोजी शाळेत जाते असे सांगून ती मुलगी वडिलांचा मोबाईल घेऊन घरातून बाहेर पडली. पण शाळेतून मुलगी घरी न आल्यामुळे वडिलांनी शोधशोध केली. ती आढळून न आल्याने वडिलांनी अज्ञाताने आपल्या अल्पवयीन मुलीला फूस लावून तिचे अपहरण केल्याची फिर्याद कणकवली पोलीस ठाण्यात दाखल केली होती. अल्पवयीन मुलीच्या वडिलांच्या मोबाईलचे लोकेशन व तांत्रिक तपास कणकवली पोलिसांकडून सुरू होता. दरम्यान, त्या मुलीकडील मोबाईल लोकेशन हातखंबा येथे आढळताच पोलीस निरीक्षक अतुल जाधव यांच्या मार्गदर्शनाखाली पीएसआय उल्हास जाधव, महिला पोलीस कॉन्स्टेबल प्रणाली जाधव यांचे पथक हातखंबा येथे गेले. हातखंबा गावात पांडवळ फाटा येथे संशयित आरोपी दीपक माने याच्या घरात तो आणि मुलगी आढळून आली. दोघांनाही ताब्यात घेऊन उल्हास जाधव व प्रणाली जाधव यांनी कणकवली पोलीस ठाण्यात आणले. दरम्यान, अल्पवयीन मुलीची इन्स्टाग्रामवर संशयित दीपक मानेशी ओळख झाली, असे समजते.