सिंधुदुर्गनगरी : जिल्हास्तरीय महसूली कामे वेळच्या वेळी पूर्ण करुन त्यानुसार अभिलेख अद्ययावत करणे, वसुलीच्या नोटीसेस पाठविणे, मोजणी करणे, अपील प्रकरणांची चौकशी करणे इ. कामे वेळच्यावेळी व वेळापत्रकानुसार करणाऱ्या अधिकारी, कर्मचाऱ्यांचा आणि वसुलीचे उद्दिष्‍ट पार करणाऱ्या अधिकारी, कर्मचाऱ्यांचा गौरव करण्याकरीता तसेच महसूल विभागाने केलेल्या कामकाजाचा आढावा जनतेसमोर ठेवण्याकरीता दरवर्षीप्रमाणे १ ऑगस्ट "महसूल दिन" म्हणून राज्यभर साजरा करण्यात येतो.
यावर्षी महसूल दिनापासून म्हणजेच दिनांक १ ते ७ ऑगस्ट २०२५ या कालावधीत राज्यभरात "महसूल सप्ताह-२०२५" साजरा करण्याच्या सूचना शासनाकडून प्राप्त झालेल्या आहेत. त्‍याअनुषंगाने महसूल विभागाकडून देण्यात येणाऱ्या सेवा आणि विभागाद्वारे राबविण्यात येणाऱ्या योजनाबाबत नागरिकांना अधिकाधिक माहिती प्राप्त होऊन त्यांना योग्‍य लाभ देण्‍याकरीता तसेच नागरिकांमध्ये जागरुकता वाढावी, शासनाच्‍या कामकाजाबद्दल नागरिकांचा विश्वास वृद्धींगत व्हावा, यासाठी जिल्हाधिकारी कार्यालय,सिंधुदुर्ग, सर्व उपविभागीय अधिकारी कार्यालये व सर्व तहसिलदार कार्यालयांकडून विशेष मोहिम व लोकाभिमूख उपक्रम राबविण्यात येणार आहेत.
दिनांक १ ऑगस्ट २०२५ रोजी महसूल दिन आणि १ ते ७ ऑगस्ट २०२५ या कालवधीत "महसूल सप्ताह" साजरा करण्यात येणार आहे. त्यानुसार कार्यक्रमाचे स्‍वरूप पुढीलप्रमाणे आहे.
दिनांक. १ ऑगस्ट रोजी "महसूल दिन साजरा केला जाऊन महसुल सप्ताहाचा शुभारंभ" होणार आहे. या दिवशी "महसुल संवर्गातील कार्यरत, सेवानिवृत्त अधिकारी, कर्मचारी यांच्याशी संवाद साधून उत्कृष्ट अधिकारी, कर्मचारी यांना पुरस्कार वितरण व मान्यवरांच्या हस्ते लाभार्थ्यांना विविध प्रमाणपत्र वितरण समारंभ" आयोजित केला गेला आहे.
दिनांक २ ऑगस्ट रोजी "शासकीय जागेवर सन २०११ पूर्वीपासून रहिवासी प्रयोजनार्थ अतिक्रमण असलेल्या कुटुंबांपैकी अतिक्रमण नियमानुकूल करण्यास पात्र असलेल्या कुटूंबांना सदर अतिक्रमित जागांचे पट्टे वाटप करण्याबाबत कार्यक्रम" आयोजित केला जाणार आहे.
दिनांक ३ ऑगस्ट रोजी "पाणंद, शिवरस्त्यांची मोजणी करुन त्यांच्या दुतर्फा झाडे लावणे" कार्यक्रमाचे आयोजन. दिनांक. ४ ऑगस्ट रोजी "छत्रपती शिवाजी महाराज महाराजस्व अभियान प्रत्येक मंडळनिहाय राबविण्यात येणार आहे. दिनांक ५ ऑगस्ट रोजी "विशेष सहाय्य योजनेतील डीबीटी न झालेल्या लाभार्थ्यांना घरभेटी करुन डीबीटी करुन अनुदानाचे वाटप करण्याबाबतचा कार्यक्रम राबविण्यात येणार आहे. दिनांक. ६ ऑगस्ट रोजी "शासकीय जमिनींवरील अतिक्रमणे निष्कासित करणे व त्या अतिक्रमणमुक्त करणे तसेच शर्तभंग झालेल्या जमिनींबाबत शासन धोरणानुसार (नियमानुकूल करणे, सरकारजमा करणे) निर्णय घेणे" याबाबतचे कामकाज करण्यात येणार आहे. दिनांक. ७ ऑगस्ट रोजी "M-Sand धोरणाची अंमलबजावणी करणे व नवीन मानक कार्यप्रणालीप्रमाणे (SOP प्रमाणे) धोरण पूर्णत्वास नेणे याकरीताचे नियोजन असून याच दिवशी महसूल सप्ताहाचा सांगता सभारंभ होणार आहे.
जिल्ह्यातील सर्व महसूल व इतर विभागातील अधिकारी, कर्मचारी तसेच नागरिकांना ही मोहिम यशस्वी करण्यासाठी सहभागी होऊन महसूल सप्ताह यशस्वी करण्याचे आवाहन जिल्हाधिकारी अनिल पाटील यांनी केले आहे.
