मालवण : निसर्गरम्य आणि ऐतिहासिक वास्तूंनी नटलेला, धार्मिक अधिष्ठान असलेल्या सिंधुदुर्ग जिल्ह्यात पर्यटनाच्यादृष्टीने तसेच ऐतिहासिक वास्तूंच्या जतन आणि संवर्धनासाठी मालवण नांदोस गढीचे शास्त्रीय उत्खनन, भगवंतगडची पुरातत्त्वीय पाहणी आणि रामगडला ‘राज्य संरक्षित वास्तू’ घोषित करण्याची प्रक्रिया लवकरच सुरू केली जाईल, अशी माहिती सांस्कृतिक कार्य मंत्री ॲड. शेलार यांनी दिली.
मालवण तालुक्यातील गडकिल्ल्यांच्या संवर्धनासंदर्भात सांस्कृतिक कार्य मंत्री ॲड. आशिष शेलार यांच्या अध्यक्षतेखाली मंत्रालयात बैठक पार पडली.
या बैठकीस सिंधुदुर्ग जिल्ह्याचे पालकमंत्री नितेश राणे, पुरातत्व विभागाचे संचालक डॉ.तेजस गर्गे, उपसचिव नंदा राऊत तसेच भाजपा तालुकाध्यक्ष धोंडी चिंदरकर, चिंदरचे उपसरपंच महेंद्र मांजरेकर, नांदोस उपसरपंच विजय निकम, संतोष गावकर, हेमंत दळवी, शुभम मटकर, ग्रामसेवक सरिता धामापूरकर आदी उपस्थित होते.
या बैठकीत मालवण तालुक्यातील २८ गुंठे क्षेत्रफळ असलेल्या नांदोस गढीचे शास्त्रीय पद्धतीने उत्खनन करून त्यातील ऐतिहासिक वारसा जगासमोर आणण्याचा निर्णय घेण्यात आला. उत्खननासाठी लागणारा निधी मंजूर करून कामाला तात्काळ सुरुवात होणार आहे.
सिद्धेश्वर मंदिर परिसरासह सुमारे २.५ एकर क्षेत्रफळातील भगवंतगडवरील संवर्धन आणि जतनासाठी पुरातत्त्व विभागाच्या अधिकाऱ्यांनी पाहणी करून अहवाल तयार करण्याचे संबंधित अधिकाऱ्यांना निर्देश देण्यात आले.
५ एकर क्षेत्रफळ असलेला मालवण रामगड किल्ला त्याच्या वास्तुशास्त्रीय, धार्मिक आणि ऐतिहासिक महत्त्वामुळे ‘राज्य संरक्षित वास्तू’ घोषित करण्यात येणार आहे. त्यासाठीची प्रक्रिया तत्काळ सुरू करण्यात येईल. या तिन्ही उपक्रमांसाठी स्थानिक ग्रामपंचायती, जिल्हा परिषद सदस्य आणि खाजगी जमिनींचे मालक यांच्या संमतीने काम राबवले जाणार आहे अशी माहिती मंत्री शेलार यांनी दिली.
