सावंतवाडी : तालुक्यातील न्हावेली गावात वन्यप्राण्यांकडून शेतीचे मोठ्या प्रमाणात नुकसान होत असल्याने शेतकरी हवालदिल झाले आहेत. रात्रीच्या वेळी गवे-रेडे शेतात घुसून नाचणी पिकासह भातशेतीचे मोठे नुकसान करत आहेत. या गंभीर प्रश्नाकडे वनविभागाचे लक्ष वेधण्यासाठी सहाय्यक वनसंरक्षक व्ही. एस. बोराटे यांची भेट घेऊन ग्रामस्थांनी शेतकऱ्यांच्या समस्या मांडल्या.

न्हावेली गावात गेल्या पाच ते सहा दिवसांपासून ओंकार हत्तीचा वावर असल्याचे सांगण्यात आले. या हत्तीला हुसकावून लावण्यासाठी वनविभागाचे कर्मचारी सुतळी बॉम्ब टाकून त्याला घाबरवण्याचा प्रयत्न करत असल्याचा आरोप ग्रामस्थांकडून करण्यात आला. अशा प्रकारांमुळे हत्ती अधिक आक्रमक होत असून भातशेती, शेतीपंप, पाण्याच्या टाक्या तसेच दुचाकी वाहनांचे नुकसान होत असल्याचे यावेळी निदर्शनास आणून देण्यात आले.

वन्यप्राण्यांचा बंदोबस्त करताना ग्रामस्थांच्या जीवित व मालमत्तेची सुरक्षितता लक्षात घेणे आवश्यक आहे. त्यामुळे हत्तीला चिथावणी मिळेल किंवा परिस्थिती अधिक गंभीर होईल, अशा उपाययोजना तातडीने थांबवून वनविभागाने सुरक्षित व प्रभावी उपाययोजना कराव्यात, अशी मागणी करण्यात आली.

शेतकऱ्यांच्या नाचणी व भातशेतीचे झालेल्या नुकसानीचे तातडीने प्रत्यक्ष पंचनामे करावेत. नुकसानग्रस्त शेतकऱ्यांना शासनाच्या नियमानुसार योग्य नुकसानभरपाई द्यावी. तसेच शेतीपंप, पाण्याच्या टाक्या आणि दुचाकी वाहनांच्या नुकसानीचीही दखल घेऊन संबंधितांना मदत मिळवून द्यावी, अशी मागणी सहाय्यक वनसंरक्षक व्ही. एस. बोराटे यांच्याकडे करण्यात आली.

वन्यप्राण्यांच्या वाढत्या वावरामुळे शेतकऱ्यांच्या उदरनिर्वाहाचा प्रश्न निर्माण झाला असून, वनविभागाने या समस्येकडे गांभीर्याने लक्ष देऊन ग्रामस्थांना तातडीचा दिलासा द्यावा, अशी अपेक्षा यावेळी व्यक्त करण्यात आली. यावेळी न्हावेलीचे माजी उपसरपंच अक्षय पार्सेकर, निगुडे माजी उपसरपंच गुरुदास गवंडे, राज धवन, दीपक पार्सेकर, वैभव चौकेकर आदी उपस्थित होते.