'लोककलेला राजाश्रय' | सावंतवाडीत लोककला महोत्सव !

सात पारंपरिक दशावतार नाट्यमंडळाचे होणार नाट्यप्रयोग
Edited by: विनायक गांवस
Published on: January 02, 2023 15:03 PM
views 265  views

सावंतवाडी : सावंतवाडी संस्थानकडून आजवर कलाकार व कलेला राजाश्रय देण्याच काम या आधीच्या राजा महाराजांनी केल. पुण्यश्लोक बापूसाहेब महाराज, श्रीमंत शिवरामराजे यांचा हा वारसा पुढे घेऊन जात आहेत ते युवराज लखमराजे सावंत-भोंसले. युवराजांच्या मार्गदर्शनाखाली ऐतिहासिक राजवाड्यात गुरूवारी ५ ते ८ जानेवारी या कालावधीत दशावतार लोककला महोत्सवाचं आयोजन केले आहे. या महोत्सवात जिल्ह्यातील सात पारंपरिक दशावतार नाट्यमंडळाचे नाट्यप्रयोग होणार आहेत. दररोज दोन नाट्यप्रयोग होणार असून ८ जानेवारीला समारोप होणार आहे. सायंकाळी ६.३० वाजता पहिला नाट्यप्रयोग, त्यानंतर रात्री ८.३० वाजता दुसरा प्रयोग होणार आहे. ५ जानेवारी रोजी सायंकाळी ६ वाजता लोककला महोत्सवाचे उद्घाटन होणार आहे.


५ जानेवारीला सायंकाळी ६.३० ते रात्री ८ या वेळेत चेंदवणकर दशावतार नाट्यमंडळ, चेंदवण यांचा 'गौरी स्वयंवर' हा नाट्यप्रयोग, त्यानंतर रात्री ८.३० ते १० या वेळेत वालावलकर दशावतार नाट्यमंडळ, ओसरगाव यांचा 'वेध राहुचे ग्रहण चंद्र सूर्याची' हा नाट्यप्रयोग होणार आहे. ६ रोजी सायंकाळी ६.३० ते ८ या वेळेत कलेश्वर दशावतार नाट्य मंडळ, नेरुर यांचा 'कर्ण पिशाच्च अर्थात अर्धसत्य' हा नाट्यप्रयोग, त्यानंतर रात्री ८.३० ते १० या वेळेत खानोलकर दशावतार नाट्य मंडळ (खानोली) यांचा पालीचा बल्लाळेश्वर' हा नाट्यप्रयोग होणार आहे.


७ जानेवारीला सायंकाळी ६.३० ते ८ या वेळेत दत माऊली दशावतार नाट्य मंडळ, सिंधुदुर्ग यांचा 'शेषात्मज गणेश' नाट्यप्रयोग, रात्री ८.३० वाजता महापुरुष दशावतार नाट्यमंडळ, सावंतवाडी यांचा 'प्रलंयकारी गणेश' नाट्यप्रयोग होणार आहे. हा ८ जानेवारीला सायंकाळी ६.३० ते ८ या वेळेत नाईक मोचेमाडकर दशावतार नाट्यमंडळ, मोचेमाड यांचा 'बहुवर्मा पुत्रप्राप्ती' हा नाट्यप्रयोग होणार आहे. त्यानंतर महोत्सवाचा समारोप होणार आहे. पारंपरिक दशावतार कला जिवंत ठेवण्यासाठी, तिचे जतन, कला वृद्धींगत करण्यासाठी तसेच आजचा तरुण वर्ग या कलेकडे आकर्षित व्हावा, या उद्देशानं सिंधुदुर्ग जिल्हा शिक्षण प्रसारक मंडळ, श्री पंचम खेमराज महाविद्यालयाच्या माध्यमातून व 

सिंधुदुर्ग जिल्हा शिक्षण प्रसारक मंडळाचे श्री पंचम खेमराज महाविद्यालय आणि संस्थेचे कार्यकारी विश्वस्त युवराज लखमराजे सावंत-भोंसले यांच्या संकल्पनेतून या दशावतार लोककला महोत्सवाचे आयोजन करण्यात आले आहे. या महोत्सवात कलाप्रेमींनी उपस्थित राहून महोत्सवाचा लाभ घ्यावा असे आवाहन श्री पंचम खेमराज महाविद्यालय प्राचार्य श्री. भारमल यांनी केले आहे.