सावंतवाडी : सिंधुदुर्ग जिल्हा प्रेस क्लबचे 2025-26 चे पत्रकार पुरस्कार जाहीर करण्यात आले असून प्रेस क्लब भुषण पुरस्कार दैनिक कोकणसादचे सिंधुदुर्ग उपसंपादक लक्ष्मण आडाव यांना तर प्रेस क्लबचा डिजिटल मिडिया पुरस्कार शैलेश मयेकर, प्रेस क्लब ग्रामीण पत्रकार पुरस्कार सुनिल आचरेकर, प्रेस क्लब कर्मचारी संघटना पुरस्कार संदेश पाटील यांना जाहीर करण्यात आला आहे. तर या निमित्ताने प्रेस क्लब जीवन गौरव पुरस्कार ज्येष्ठ पत्रकार सिताराम गावडे यांना जाहीर करण्यात आला आहे.

हे पुरस्कार शुक्रवारी प्रेस क्लबच्या जिल्हा कार्यकर्णीतील निमंत्रित सदस्यांच्या उपस्थित जाहीर करण्यात आले असून या पुरस्काराचे वितरण लवकरच करण्यात येणार आहेत.६ जानेवारी हा पत्रकार दिन म्हणून साजरा करण्यात आला त्या दिवशी पुरस्कारांबाबत चर्चा झाली.

यात दै.कोकणसाद चे उपसंपादक लक्ष्मण आडाव हे गेली अनेक वर्ष पत्रकारितेत असून वेगवेगळ्या वृत्तपत्रातून आपली पत्रकारिता करत त्यांनी स्वतःची वेगळी छाप निर्माण केली आहे. सध्या ते उपसंपादक असून वेगवेगळ्या विषयांवर लेखन केले आहे.  ज्येष्ठ पत्रकार सिताराम गावडे यांना प्रेस क्लबकडून जीवन गौरव पुरस्कार जाहीर करण्यात आला असून त्यांनी आपल्या पत्रकारितेच्या माध्यमातून वेगवेगळ्या विषयांना दिलेला न्याय नेहमीच अन्याया विरोधात केलेला प्रतिकार यासाठी हा पुरस्कार जाहीर करण्यात आला आहे.

तर कसाल येथील सुनिल गणपत आचरेकर यांना प्रेस क्लब चा ग्रामीण पत्रकार पुरस्कार, शैलेश मयेकर, संदेश पाटील यांना प्रेस क्लब डिजिटल मिडीया पुरस्कार जाहीर करण्यात आला आहे. या पुरस्काराचे स्वरूप शाल, श्रीफळ, रोख रक्कम व प्रशस्तीपत्र असे असणार आहे. पुरस्काराची घोषणा जिल्हा कार्यकर्णी च्या निमंत्रित समितीकडून जाहीर करण्यात आली.

यावेळी प्रेस क्लबचे विद्यमान अध्यक्ष अनंत जाधव, सचिव राकेश परब यांच्यासह सदस्यांनी पुरस्कार विजेत्यांचे अभिनंदन केले. दरम्यान,  फेब्रुवारीच्या पहिल्या आठवड्यात मान्यवरांच्या उपस्थितीत हे पुरस्कार वितरण होणार आहे.