कुडाळ : कुडाळ शहरातील आंबेडकर नगर येथील मुख्य रस्त्यावर उघड्यावर लटकत असलेले धोकादायक फ्युज  बदलून त्या ठिकाणी तातडीने सेफ्टी बॉक्स सह सुसज्ज फ्युज पेटी बसवण्यात आल्याने परिसरातील नागरिकांनी समाधान व्यक्त केले आहे. उबाठा शिवसेना नगरसेवक मंदार शिरसाठ यांच्या नेतृत्वाखाली कुडाळ शहरातील नागरिक, शिवसेना, युवा सेना आणि महिला आघाडीच्या कार्यकर्त्यांनी नुकतीच एम.एस.ई.बी. कार्यालयाला भेट दिली होती.

या भेटीदरम्यान, कुडाळ आंबेडकर नगर येथील शिवसेना कार्यकर्ते भूषण कुडाळकर यांनी विशेषत्वाने आंबेडकर नगर येथील मुख्य रस्त्यावरील धोकादायक स्थितीकडे लक्ष वेधले. त्यांनी उघड्यावर, धोकादायक पद्धतीने लटकत असलेल्या फ्युजमुळे मोठा अपघात होण्याची शक्यता व्यक्त केली होती. कुडाळकर यांनी व्यक्त केलेल्या भीतीची एम.एस.ई.बी. (महाराष्ट्र राज्य वीज वितरण कंपनी लिमिटेड - MSEDCL) प्रशासनाने तातडीने दखल घेतली.

धोकादायक व तुटलेले फ्युज त्वरित बदलून त्या ठिकाणी अत्याधुनिक सुरक्षा मानकांचे पालन करणारी, सेफ्टी बॉक्स असलेली सुसज्ज फ्युज पेटी बसवण्याचे काम पूर्ण करण्यात आले.

सदर महत्त्वाचे व तातडीचे काम मार्गी लावण्यासाठी नगरसेवक मंदार शिरसाठ आणि शिवसेना पदाधिकारी भूषण कुडाळकर यांनी विशेष पाठपुरावा केला. त्यांच्या सातत्यपूर्ण प्रयत्नांमुळे परिसरातील नागरिकांवरील अपघाताचे संभाव्य संकट टळले आहे.

यावेळी फ्युज पेटी बसवण्याच्या कामादरम्यान नगरसेवक मंदार शिरसाठ, भूषण कुडाळकर, अमित राणे, नयन चव्हाण, विनोद खन्नाळकर व एम.एस.ई.बी.चे संबंधित कर्मचारी उपस्थित होते. एम.एस.ई.बी.ने केलेल्या या तात्काळ कामामुळे आंबेडकर नगर येथील रहिवाशांनी समाधान व्यक्त केले असून, नगरसेवक मंदार शिरसाठ व भूषण कुडाळकर यांचे आभार मानले आहेत.