सावंतवाडी : वर्षानुवर्षे ज्या प्रश्नासंदर्भात गेळेवासीय संघर्ष करत होतो तो कबुलायतदार गांवकर जमीन प्रश्न सुटला आहे. महायुती सरकारनं हा प्रश्न मार्गी लावला असून गेळे कबुलायतदार महाराष्ट्र शासनाच्या जमीनीचे वाटप व पोटहिस्सा मोजणीच्या कागदपत्रांचे वाटप सावंतवाडी येथील बॅरिस्टर नाथ पै सभागृहात संपन्न झाले. पालकमंत्री रवींद्र चव्हाण तसेच शालेय शिक्षण मंत्री दीपक केसरकर यांच्या हस्ते प्रातिनिधिक स्वरूपात १० ग्रामस्थांना शासनाच्या पत्राचे वाटप करण्यात आले.
यावेळी शिक्षणमंत्री दीपक केसरकर व पालकमंत्री रवींद्र चव्हाण यांनी मुख्यमंत्री उपमुख्यमंत्री व महसूलमंत्र्यांचे विशेष आभार व्यक्त केले. मंत्र्यांच्या हस्ते प्रातिनिधिक स्वरूपात जमीनीचे वाटप व पोटहिस्सा मोजणीच्या कागदपत्रांचे वाटप करण्यात आले. दरम्यान, गेळे गावातील जमिनीचे वाटप सुरू झालेले असताना आंबोली व चौकुळ जमीनीची मोजणी देखील सुरू करण्यात आली. त्याबाबतचे पत्र दोन्ही गावांतील प्रमुख लोकांना प्रातिनिधिक स्वरूपात पालकमंत्री रविंद्र चव्हाण यांच्या हस्ते प्रदान करण्यात आले. याबद्दल गेळे वासियांनी दोन्ही मंत्र्यांचे आभार मानले. पालकमंत्री रविंद्र चव्हाण, शालेय शिक्षणमंत्री दीपक केसरकर व सावंतवाडीचे युवराज लखमराजे भोंसले यांचे शाल, श्रीफळ व पुष्पगुच्छ देऊन गेळे वासियांनी ऋण व्यक्त केले. तसेच आंबोली व चौकुळ वासियांनी देखील आभार मानले.
यावेळी शालेय शिक्षणमंत्री दीपक केसरकर, भारतीय जनता पार्टी युवा मोर्चाचे उपाध्यक्ष युवराज लखमराजे भोंसले, माजी आमदार राजन तेली, माजी नगराध्यक्ष संजू परब, भाजप जिल्हाध्यक्ष प्रभाकर सावंत, जिल्हा परिषदेचे माजी अध्यक्ष अशोक सावंत, माजी नगराध्यक्ष संजू परब , जिल्हा बँक संचालक महेश सारंग, अतिरिक्त जिल्हाधिकारी पद्मश्री बैनाडे, मुख्य कार्यकारी अधिकारी मकरंद देशमुख, प्रांताधिकारी हेमंत निकम, तहसीलदार श्रीधर पाटील, भाजपचे युवा नेते संदीप गावडे, गेळे सरपंच सागर ढोकरे, आंबोली सरपंच सावित्री पालेकर, चौकुळ सरपंच सुरेश शेटये , जि. प .चे माजी उपाध्यक्ष रणजीत देसाई, एकनाथ नाडकर्णी, शिवसेनेचे जिल्हाप्रमुख अशोक दळवी, तालुकाप्रमुख बबन राणे, वेंगुर्ले तालुकाप्रमुख नितीन मांजरेकर, दिनेश गावडे, माजी नगरसेवक ॲड. परिमल नाईक, भाजपचे बांदा मंडल अध्यक्ष महेश धुरी, सावंतवाडी शहर मंडल अध्यक्ष अजय गोंदावळे, माजी सभापती पंकज पेडणेकर, माजी नगरसेवक तानाजी वाडकर आदी उपस्थित होते.
