सावंतवाडी : मराठी पत्रकार दिनाचं औचित्य साधून शिक्षण प्रसारक मंडळ सावंतवाडी तर्फे राणी पार्वती देवी हायस्कूल व ज्युनिअर कॉलेज सावंतवाडीच्या माध्यमातून तालुक्यातील पत्रकारांचा गौरव करण्यात आला. आरपीडीच्या स्नेहसंमेलनप्रसंगी हा सन्मान सोहळा आयोजित करण्यात आला होता. यावेळी आद्यपत्रकार बाळशास्त्री जांभेकर यांच्या जयंती निमित्त अभिवादन करण्यात आलं. तसेच संस्थेचे अध्यक्ष विकास सावंत यांच्या हस्ते उपस्थित पत्रकार बांधवांचा गौरव करण्यात आला. सत्काराला उत्तर देताना पत्रकार बांधवांनी संस्था व शाळेचे ऋण व्यक्त केले.
आरपीडी हायस्कूल व ज्युनिअर कॉलेजमध्ये विद्यार्थी स्नेहसंमेलन सुरु असून शनिवारी मराठी पत्रकार दिन असल्यानं त्याच औचित्य साधून तालुक्यातील पत्रकार बांधवांचा गौरव सोहळा आयोजित करण्यात आला होता. संस्थेचे अध्यक्ष विकास सावंत यांच्या हस्ते उपस्थित पत्रकारांचा शाल, श्रीफळ व पुष्प देऊन सन्मान करण्यात आला. समाजासाठी चोवीस तास झटणाऱ्या पत्रकारांचा 'पत्रकार दिनी' गौरव करावा असा यामागचा उद्देश असल्याचे संस्थाध्यक्ष विकास सावंत
यांनी सांगितले. यावेळी त्यांच्या हस्ते ज्येष्ठ पत्रकार अभिमन्यू लोंढे, तालुका पत्रकार संघाचे अध्यक्ष हरिश्चंद्र पवार, प्रविण मांजरेकर,सचिन रेडकर, अमोल टेंबकर, अनंत जाधव, विनायक गांवस, निखिल माळकर, अनुजा कुडतरकर,शैलेश मयेकर,आनंद धोंड, प्रा.रूपेश पाटील, भुवन नाईक यांचा सन्मान करण्यात आला. यावेळी सत्काराला उत्तर देताना ज्येष्ठ पत्रकार प्रविण मांजरेकर म्हणाले, स्व.भाईसाहेब सावंत यांचा समाजसेवेचा वारसा संस्थाध्यक्ष विकास सावंत पुढे घेऊन जात आहे. आद्यपत्रकार बाळशास्त्री जांभेकर यांचं स्मरण आज संस्था व शाळेनं करत पत्रकारांचा जो सन्मान केला त्याबद्दल आम्ही ऋणी आहोत. तर पत्रकारांची सहसा कुणी आठवण काढत नाहीत. परंतु, आरपीडी व संस्थाध्यक्ष विकास सावंत यांनी आम्हाला आमंत्रित करत आमचा सन्मान केला त्याबद्दल त्यांचे आम्ही आभारी असल्याचं मत ज्येष्ठ पत्रकार अभिमन्यू लोंढे यांनी व्यक्त केल. दरम्यान, उपस्थित पत्रकारांच्या हस्ते शिक्षकेत्तर कर्मचारी मारूती वावधने यांसह गुणवंत विद्यार्थ्यांचा सत्कार करण्यात आला.
याप्रसंगी संस्थेचे अध्यक्ष विकास सावंत, सचिव प्रा. व्ही.बी. नाईक, खजिनदार सी.एल.नाईक, शाळा समिती अध्यक्ष डॉ. दिनेश नागवेकर, संचालक अमोल सावंत, सोनाली सावंत, प्रा.सतिश बागवे, माजी प्राचार्य के.टी.परब, प्राचार्य जगदीश धोंड, उपप्राचार्य डॉ. सुमेधा नाईक, उपमुख्याध्यापक पी.एम.सावंत आदी उपस्थित होते. कार्यक्रमाचे सूत्रसंचालन प्रा. मिलींद कासार यांनी तर आभार शिक्षका प्रिती सावंत यांनी मानले.
