संगमेश्वर : तालुक्यात ऐन शिमग्याच्या धामधुमीत गावोगावी ग्रामदेवतांच्या पालख्या भक्त गणांच्या भेटीला त्यांच्या स्वगृही येत असतानाच, विघ्रवली गावातील हर्डीकर कुटुंबातील एका सदस्याचा मृत्यू झाला. ग्रामदैवताचे पालखीचे शिंपण कार्यक्रम सुरू असल्याने, अंत्यसंस्कार करायला गावातील लोक लवकर येऊ शकणार नव्हते, आणि प्रेत अधिक काळ ठेवणे शक्य नसल्याने, हर्डीकर कुटुंबावर काहीसा बाका प्रसंग ओढवला.
घरात मयत झाल्याची कुटुंबियांनी जवळपासच्या सर्व लोकांना माहिती दिली. तशीच माहिती काटवली ढोसळवाडी येथील लोकांपर्यंत त्या कुटूंबाने दिली. कारण ही लोकवस्ती हाकेच्या अंतरावर आणि अगदी नदिपलीकडे आहे. परंंतू ग्रामदेवाचा शिमगोत्सवातील शिंपणे हा सांगता कार्यक्रम सुरु असल्याने, अंत्यसंस्कारासाठी लोक उशीरा पोहोचतील असे त्या कुटुंबाला कळविण्यात आले.
या कुटुंबाची अथवा उपस्थित नातेवाईकांची संख्या पुरेशी नसल्याने मृतदेहाचे अंत्यसंस्कार पुढाकार घेताना कोणीच तयार नव्हते. अशा विपरीत परिस्थितीत उशीरापर्यंत प्रेत ठेवणे योग्य नसल्याने, विघ्रवली गावातील माजी महिला सरपंच सौ.संपदा भुरवणे यांनी पुढाकार घेत, उपस्थित गावकरी आणि पुरुषांच्या मदतीने प्रेताच्या अंत्यसंस्काराची तयारी सुरु केली. त्यांनी उचललेले पाऊल खरोखरच कौतुकास्पद आहे.
सौ.भुरवणे यांनी चक्क प्रेताला खांदा देत, सरणासाठी लाकडे आणणे, सरण रचणे अशा कामातही मदत केली. सौ. संपदा भुरवणे या काटवली ढोसळवाडी येथील माहेरवाशीण, एक आदर्शवत कृती करुन संपदा भुरवणे यांनी इतर महिलांना आणि कर्मठ व्यवस्थेला बोध घ्यायला भाग पाडले आहे. सौ.संपदा भुरवणे या पंचक्रोशीतील माघी गणरायाची निस्सीम भक्त आहे. त्यांनी केलेली कृती प्रशंसनीय आहे. पंचक्रोशीतील सर्व लहान थोरांना त्यांचा अभिमान वाटतो आहे.
इतरांच्या दुःखात सहभागी होताना, चाकोरीबाहेर पाऊल टाकण्याचे धाडस क्वचित काही लोक करतात. काही गोष्टी म्हणजे भ्रामक कल्पनांना आव्हान देणे लोक टाळतात. जर तेच आव्हान कुणी लिलया पेलले तर लोक प्रशंसा करतात,टाळ्या वाजवून प्रशंसा करतात.
समाजात बदल घडतो आहे. त्या बदलाचा आपण जर का भाग बनलो तरच सशक्त विचारांचा समाज निर्माण होईल. भ्रामक कल्पनांचा भोपळा फुटेल. चांगली कृती केली अथवा त्या कृतींचे समर्थन जरी केले तरी हा मनुष्य जन्म भरून पावेल! हा आदर्श संगमेश्वर तालुक्यातील एक महिला माजी सरपंच सौ.संपदा भुरवणे यांनी घालून दिला आहे.
