'निरामय'च्यावतीने डोळे तपासणी शिबिर !

Edited by: ब्युरो
Published on: May 29, 2024 14:06 PM
views 171  views

सावंतवाडी : निरामय विकास केंद्र, कोलगाव आणि गुरुजी एज्युकेशन फाऊंडेशन, ठाणे यांच्या संयुक्त विद्यमाने दृष्टी दोष असणाऱ्या  विद्यार्थ्यांसाठी डोळे तपासणी शिबिराचे आयोजन केले होते.

निरामय विकास केंद्रातर्फे, जानेवारी 24 मध्ये सावंतवाडी तालुक्यातील सर्व प्रकारच्या दिव्यांग विद्यार्थ्यांची यादी मिळण्यासाठी जिल्हा परिषद, शिक्षण विभाग यांच्याकडे अर्ज केला होता. या यादी मिळवून देण्यासाठी सावंतवाडीतील शिक्षक व गट शिक्षणधिकारी श्रीमती बोडके यांनी उत्तम सहकार्य केले. या यादीमध्ये वेगवेगळ्या प्रकारचे शारीरिक अक्षमता असणाऱ्या एकूण 538 विद्यार्थ्याचा समावेश आहे.

या मिळालेल्या माहितीमुळे माऊली कर्णबधिर विद्यालयातील 11 विद्यार्थ्यांना निरामय तर्फे श्रवण यंत्र देण्यात आली.तसेच थालसेमिया आजार असणाऱ्या 3 विद्यार्थ्यांना रक्त चढविण्यासाठी मार्च 2024 पर्यंत झालेला खर्च पालकांना देण्यात आला. त्याच उपक्रमाचा पुढील भाग म्हणून याच यादीतील दृष्टीदोष असणाऱ्या 30 विद्यार्थ्यांशी गुरुजी एज्युकेशन फाऊंडेशन, ठाणे ची कार्यकर्ती शुभांगी पवार हिने मागचे सुमारे 8 दिवस पालकांना सातत्याने फोन करून शिबिराची व्यवस्थित माहिती दिली.

सतत संपर्क केल्यानंतर आज उपस्थित राहिलेल्या 10 विद्यार्थ्यांच्या डोळ्यांची तपासणी  डॉ.नेहा सावंत, गवळी तिठा, सावंतवाडी यांच्या सहकार्याने त्यांच्या दवाखान्यात  करण्यात आली. तसेच पालकांना तपासणी नंतर करावयाच्या उपाययोजना व घ्यावयाची काळजी याविषयी सविस्तर माहिती देण्यात आली.

आजची तपासणी, देण्यात आलेली औषधे व काही विद्यार्थ्यांना डोळ्यांचा नंबर काढून द्यावे लागणारे चष्मे हा सर्व खर्च संस्थेतर्फे करण्यात येणार आहे.  या शिबिरात इ.3 री ते 12 वी च्या 10 विद्यार्थ्यांची तपासणी करण्यात आली. यामध्ये 7 विद्यार्थीनी व 3 विद्यार्थ्याचा समावेश होता. हे विद्यार्थी कोलगाव, कुणकेरी, माडखोल सांगेली, आंबोली, माजगाव व निरवडे या गावातून आले होते. या विद्यार्थ्यांना यापुढेही या संबंधी अधिक मार्गदर्शन, आवश्यकतेनुसार आर्थिक मदत करण्यात येणार आहे.

या शिबिरासाठी निरामय विकास केंद्रच्या वंदना करंबेळकर, अर्चना वझे, प्रसाद घाणेकर, सुषमा राऊत, निरामय प्रायोजित सुचिता कांडरकर तसेच गुरुजी एज्युकेशन फाऊंडेशन ठाणे च्या डॉ.ललिता देशपांडे उपस्थित होत्या.